Jabier Muguruza eta Bernardo Atxaga, Oiasson errezitaldian
Hilaren 21ean izango da errezitaldia, Oiasso Museoan, 19:00etan hasita. Doan da, baina tokiaren erreserba egin behar da.
Abenduaren 3ko Euskararen Egunaren harira hainbat jarduera eta ekintza antolatu dituzte hiriko eragileek, Irungo Udalarekin elkarlanean. Jada martxan da Jantzi euskararen betaurrekoak lelopeko emanaldien eta bestelakoen sorta. Horietako bat hilaren 21ean izango da, 19:00etan eta Oiasso Museoan: Jabier Muguruzak eta Bernardo Atxagak errezitaldia egingo dute.
Bertan izateko ez da sarrerarik erosi behar; erreserba, ordea, egin behar da aforo mugak betetze aldera. Hala, erreserba hori edo gonbidapena Oiasson bertan jaso daiteke, astelehenetik igandera 10:00etatik 14:00etara, eta ostiral nahiz larunbatetan 16:00etatik 19:00etara.
Horrez gain, badira jada eginak diren hainbat emanaldi eta saio. Eta hilaren 21etik aurrera ere badira gehiago. Horietako bat da Muguruzaren eta Atxagaren errezitaldiaren biharamunean egingo den Euskal Herriko Hitz Gurutzatuen X. Txapelketa; Palmera Monterok jasoko du lehia hori.
