Korrokoitz eremuaren urbanizazio proiektua onartu dute
Erreka ondoan pasealekuak, berdeguneak eta parkeak eraikiko dituzte. Etxebizitzak 63 publikoak izango dira eta 250 libreak.
Cristina Laborda eta Sergio Javier. Korrokoitz eremua urbanizatzeko proiektua behin betiko onartu du Irungo Udalak. Hiriguneko eremurik “degradatuena” da gaur egun udalaren ustez, eta proiektuaren onarpenarekin aurrerapauso bat eman dute ingurunea “modernizatzearen” alde. 16.000 metro karratu baino gehiagoko antolamendua izango da, eta pasealekuak, parkeak eta etxebizitzak aurreikusten dituzte bertan. 63 etxebizitza publiko eta 250 bat etxebizitza libre eraikiko dituzte.
Atzo auzo bilera bat antolatu zuen udalak, inguruko bizilagunekin. Bertan aurkeztu zuten proiektua, 2009ko Alde Zaharra Birgaitzeko Plan Bereziaren harira egindako aldaketei jarraipena emango diona. Plan horren barnean Mosku plaza, Uranzu pilotalekua eta San Martzial kalea zaharberritu dira azken urteetan. Orain, baina, Korrokoitz eremuko proiektua ekimen pribatuko hirigintza garapena izango da. Osotasunean, espazio publikoen eta berdeguneen 7.560 metro karratu berri izango dira.
Hainbat elementu berritzaile aurkeztu dituzte proiektuaren barnean. Horien artean, etxebizitzak eta errekaren alboko pasealekua nabarmentzen dira. Kanalaren ubidea birnaturalizatu egingo dute, Artian egiten ari diren moduan. Erreka alboan, oinezkoentzako eta bizikletentzako pasealeku bat egingo dute, berdegunez osatuta. Gainera, parkeak ere izango dira, hiru zehazki. Bat haurrentzako izango da, beste bat zahartze aktiborako zirkuitua, eta azkena, kalistenia parke bat.
Proiektuaren barnean zortzi bizitegi partzela atonduko dira. Hiru etxebizitza publikoak eraikitzeko izango dira, 4.887 metro karratukoak guztira, eta beste bost etxebizitza libreentzat, 19.525 metro karraturekin. Eraikuntzarako, eremuan lehendik dauden eraikinak eraitsi beharko dituzte; baita ere baratzak, txabolak eta negutegiak. Eraikiko diren eraikinak Alde Zaharreko beste etxebizitzen estetikarekin bat egin beharko dute. Etxebizitzez gain, beheko solairuetan hirugarren sektorerako zuzendutako lokalak eraikiko dira, horrela, merkataritza bulebar bat sortuz.
Hiru faseko prozesua
Bizilagunekin batera aurkezpenean Cristina Laborda alkatea izan zen. “Korrokoitzek benetako iraultza urbanoa biziko du. Denboraren poderioz degradatutako eremu batetik, espazio erakargarri bihurtuko dugu, irundarrek hirian beren bizi-proiektua garatzen jarrai dezaten, bai eta herritar guztientzat ere. Helburu nagusia espazioa berreskuratzea da, familia berriek Alde Zaharraren bihotzari bizia eman diezaioten”, adierazi du alkateak.
24 hilabeteko epean egingo dela aurreikusten dute, 4,5 milioi euroko aurrekontuarekin. Lehenik, ur hornidurak saneatu beharko dituzte, kanalarekin lotura egiteko. Ondoren, hiru faseko urbanizazio prozesua egingo dute. Lehenik, lehendik dauden eraikinak eraitsi, Korrokoitz kale berria, pasealekuaren zati bat eta merkataritza bulebarraren zati bat egingo dute. Bigarrenik, bulebarraren eta erdiko berdeguneen jarraipenari ekingo diote. Azkenik, hirugarren fasean, kanal ondoko pasealekua amaitzea eta barruko kaleak urbanizatzea geratuko litzateke.
