Lehen greba eguna egin dute gaur Txinzerreko langileek
Gaurko greba egunak jarraipen "zabala" izan du, eta enpresak negoziaketa onartu arte, hainbat greba deialdi egingo dituztela iragarri dute.
Txinzerreko langileak, gaur, greba egunean. Lehen greba eguna egin dute gaur Txingudiko Zerbitzuakeko langileek. Uda aurretik hainbat eskaera helarazi zizkioten langileek enpresari, “enpresa hitzarmena negoziaketa oztopatzen eta blokeatzen ari delako”. Hainbat mobilizazio eta lanuzte egin dituzte azken hilabeteetan, baina enpresaren asmo hutsa ikusita, greba eguna egin dute. Langileek adierazi dutenez, jarraipen “zabala” izan du lehen greba egunak.
Txinzerreko langile batzordeak argi du: enpresaren jarrera hasieratik negoziaketa atzeratzearen eta oztopatzearen aldekoa da. Langileek hitzarmenaren iraunaldirako KPIaren goitik dauden soldata igoerak, azken urteetan izandako eros ahalmena, enpresak hitzarmena aplikatzeari uztea ekiditen duten klausula eta bajak baldintzarik gabe osotasunean osatzea eskatzen dute, besteak beste. Horrez gain, ordutegien, egutegien, baimenen eta lizentzien inguruan hainbat aldarrikapen dituzte, eta baita ere azpikontratazioa mugatzea.
ELA eta LAB sindikatuen eskutik jo dute gaur grebara. Eguna batzar batekin hasi dute, eta ondoren elkarretaratzea egin dute Olaberria auzoan, bulego nagusien aurrean. Ondoren, hainbat kotxe karabana egin dituzte Irunen eta Hondarribian zehar, haien aldarriak megafonia bidez zabalduz. Pikete informatiboak ere izan dira. Irungo Jendaurreko Arreta Bulegoaren aurrean beste elkarretaratze bat egin dute.
Negoziaketa onartu arte
Ohar bidez, ELAk Irungo eta Hondarribiko udal gobernuei eskatu die Txinzerreko langileekiko errespetuz eta arduraz jokatzea, eta edukiz beteriko negoziaketa zintzo bat aurrera eramatea. Haien negoziaketa eskaerak bete arte hainbat greba deialdi egingo dituzte langileek. Oraingoz, iragarri dutenez, azaroaren 24an, 25ean, 26an, 27an eta 28an greba egunak egingo dituzte.
