Hondarribiko Udalak ia 14 milioi euroko demanda bat jaso du
2019-2023ko agintaldian onartu zen HAPOa baliogabetzearen ondorioz, Higertoki eta Zaldunborda Berri sustatzaileek 13.700.000 milioi euroko demanda aurkeztu dute Hondarribiko Udalaren kontra.
Hondarribiko Udalak kezkaz jaso du Zaldunbordako makro outleta bultzatu zuten sustatzaileek, Higertoki eta Zaldunborda Berrik, udalaren kontra aurkeztu duten 13.700.000 euroko demanda. Udalak makro outletaren sustatzaileei diru kopuru hori ordainduko balie «udal kontuek kolpe handia» jasoko luketelako, eta aldi berean, «EAJko udal arduradunek egindako akats larrien erantzule» izango liratekeelako.
Irungo epaitegian jarritako demandan zehazten denez, EAJren gobernuak HAPOa osatzerakoan «egindako akatsek» planaren baliogabetzea eragin zuen 2019-2023 agintaldian, eta ondorioz, HAPOan jasota zegoen Zaldunbordako makro outletaren proiektua bideraezina bihurtu zen. Proiektua bertan behera gelditzeak kalte ekonomikoak eragin dizkiela adierazi dute enpresek, eta hori izan da udalaren kontrako demanda aurkezteko arrazoia.
Udal gobernuak «larritzat» jo du bi sustatzaileen eskaera, eta herritarren kontura «milioiak irabazi» nahi izatea leporatu diete: «Demanda hau jartzea larria da, hondarribiarrei eta tokiko merkataritzari inolako onurarik ekarriko ez zion proiektu baten sustatzaileek berriro ere gure kontura milioiak irabazi nahi dituztelako, modu bidegabean».
Bertan behera geratu zen proiektuan jasota zegoenez, Zaldunbordako makrooutleta eraikitzeak 2 milioi euro inguruko kostua izan behar zuen. Orain, demandaren bidez, «ia 14 milioi euroko kalte-ordain bihurtu nahi dute» deitoratu dute. «Hondarribiarrok ezin dugu hipotekatu gure oraina eta etorkizuna politiko batzuen kudeaketa kaskarrarengatik».
Udal ondarearen defentsa
Igor Enparan alkateak zuzentzen duen udal gobernuak herritarren interesak eta udal ondarea irmo defendatuko dituela esan du, eta dituen baliabide guztiak martxan jarriko dituztela iragarri du, «sustatzaile horien asmoei aurre egiteko».
Aldi berean, prozesuaren urrats guztiak herritarrei «gardentasunez» azalduko dizkietela adierazi du, eta azterketa eta datu guztiak herritarren eskura jarriko dituela.
Gainera, prozesu horrek guztiak, alde ona ere izan dezakeela esan du udal gobernuak: «Gutxi dakigu oraindik Zaldunbordako makro outlet proiektuaren inguruan zeuden interes ekonomiko eta politikoen gainean». Demanda jarri izanak, beraz, «interes ezkutu» horien gainean «argi izpi gehiago» izaten lagun dezakeela uste dute.
