Pintaketa matxisten aurka hainbat eragilek erantzun dute
Atzo Ernaik zabaldutako atxikipen kanpainara hainbat eragile batu dira. Emakumeen Etxeak eta AA Gaurko Andreak elkarteak haien adierazpena zabaldu dute.
Irunen atzo gauean egin ziren pintadak direla eta, herriko hainbat eragilek haien gaitzespena erakutsi dute. Udalak adierazpen instituzional baten bidez salatu zuen kasua, jarrera misogino eta matxista moduan hartuz, baina ez da bakarra izan.
Ernaik atzo zabaldu zuen atxikimendu kanpainara hainbat elkarte eta erakunde atxiki dira: Sortu Irun, BorBor Bidasoaldeko hausnarketa kolektiborako plaza, Lumak Haize Irungo LGTBIAQ+ elkartea, Ernai Irun, Antxeta Irratia, Ikama eta Hazia taberna. “Guk argi diogu, ez dugu inolako erasorik onartuko! Diskurtso faxisten aurrean antolakuntza feminista!”, adierazi zuen Ernaik.
AA Gaurko Andreak elkarteak bere adierazpena zabaldu zuen atzo. “Ekintza isolatua dirudien arren, ez da kasu bakana: gazte batzuen artean, bereziki gizonen artean, gorroto diskurtsoak eta feminismoaren aurkako jarrerak zabaltzen ari dira”, azaldu du berdintasunaren aldeko elkarteak. Adierazi dute urteak daramatzatela Irungo eskoletan feminismoari lotutako hezikidetza tailerrak ematen, eta konturatu direla egun gazte batzuek feminismoa mehatxutzat ikusten dutela. “Horregatik Hezkidetza-tailerrak emateko era aldatu dugu, egoera honetara egokitzeko eta gazteek berdintasuna aukera eta askatasun gisa senti dezaten, eta ez mehatxu gisa”.
Horrez gain, AA Gaurko Andreak elkarteak adierazi du Euskal Autonomia Erkidegoan eta Nafarroan egindako ikerketek erakusten dutela emakume gazteek berdintasunaren alde jarraitzen dutela, “baina gizon gazteen zati batek jarrera tradizionalak mantentzen dituela edo feminismoa gaizki ulertzen duela”. Horregatik, elkartetik uste dute beharrezkoa dela berdintasunaren aldeko hezkuntza sustatzea, gazteen artean ez ezik, irakasleen eta familien artean ere.
Irungo emakumeen aurkako “erasoa”
Irungo Emakumeen Etxeak bere adierazpena zabaldu du. “Pintaketa horiek ez dira gizabidearen kontrako ekintza soilak. Emakumeenganako gorrotoa eta erasoa sustatzen dute eta Irungo emakume guztien aurkako zuzeneko eraso bat dira”. Horrez gain, gehitu dute eremu publikoa ezin dela erabili matxismoa eta indarkeria legitimatzen dituzten mezuak zabaltzeko, eta ezin direla horrelako jarrerak normalizatu.
