Txingudi pasabideari buruzko proposamenak plazaratu ditu Balaztak
Pasabidea argiztatzeko lanekin "pozik" badaude ere, sortu diren arazoei irtenbide bat emateko beharra dagoela adierazi, eta pasabidearen azken lotura egiteko Irungo Udalaren inplikazioa eskatu dute.
Santiago auzoa eta Plaiaundi lotzen dituen oinezkoentzako eta bizikletentzako pasabidean argiztapena jartzeko obrak hasi ditu Irungo Udalak, pasabidea inauguratu eta hamar hilabetera.
Lan horiek orduko hartan “paraleloki” egin behar zirela uste duten arren, albiste horren aurrean “pozik” agertu dira Balazta elkarteko kideak. Izan ere, aurrerantzean, oinezkoak zein txirrindulariak “argirik gabeko orduetan segurtasunez eta ikusgaitasunez” ibili ahal izango dira. Aldi berean, horri esker azpiegituraren erabiltzaile kopurua handituko duela uste dute.
Hala ere, elkartea oso kritiko mintzatu da obraren inguruan, eta lanak bere osotasunean gauzatu ez izanak “zenbait arazo” sortu dituela esan dute. Horren aurrean, eragozpenak konpontzeko proposamenak luzatu dituzte:
- Instalazio elektrikoa egiteko pasealekua sei astez itxiko dute, eta herritarrei eragingo dizkien kalteak kontuan izanik, Irungo Udalari ibilbidea partzialki irekita mantentzea eskatu diote elkartekideek, itxierak soilik zonalde zehatzetara mugatuz.
- Hamar hilabetez Pierre Loti kaleko landaredia zaindu gabe egon dela salatu dute ere, eta arrisku egoerak saihesteko “lehenbailehen” garbitu eta inaustea eskatu dute.
- Ibilbidea inauguratu zenetik hainbat erabiltzailek Etorbideko zubia arrapala eta eskailera bidez lotzeko beharra adierazi dutela esan dute, eta hura eraikitzeko eskatu dute. “Horrek Hendaiarako ibilbidea 600 metro inguru laburtuko luke, itzulinguru handi bat egitea saihestuz, mugikortasun jasangarria erraztuz eta segurtasuna hobetuz”.
- Azkenik, salatu dute herritarrek ez dutela berririk Irun eta Hondarribia Mendelu auzoaren bidez bizikletaz eta oinezkoz lotzeko proiektuaren egoerari buruz, eta horri buruzko informazioa izatea eskertuko luketela.
Gainera, gogoratu dute, Irun eta Hondarribia arteko bizikleta lotura duela 15 urte baino gehiagotik zegoela aurreikusita Foru Aldundiko eta bi udalen Hiri Mugikortasun Jasangarriko planetan. Eta proiektuak bere aurrekontu propioa izan eta laster egingo zela iragarri izan duten arren, oraindik gauzatu gabe jarraitzen duela deitoratu dute.
Dena den, elkartekideen ustez lehentasuna Txingudi pasabidea bukatzeari eman behar zaio, eta horretarako bi udalen inplikazioa eskatu dute. “Eskatzen diegu jar daitezela lehenbailehen harremanetan proiektuaren diseinuan eta gauzatzean eragina duten gainerako erakunde eta administrazioekin; eta egungo egoera desblokeatuko duen lan mahai bat sor dezatela”.
Azken eskakizun horri begira, jakinarazi dute Balaztako kideek agerraldia egingo dutela hilaren 17an Gipuzkoako Batzar Nagusietan Foru Aldundiaren inplikazioa eskatzeko. Eta horretaz gain, Irungo Udaleko mugikortasun ordezkariari ere biltzeko eskakizuna egingo diotela adierazi dute.
