Emakumeak eta kirola hurbiltzea helburu duen proiektua
M Proiektua aurkeztu dute Irungo Emakumeen Etxean, emakume ez aktiboak jarduera fisikora erakartzeko egitasmoa.
Emakume ez aktiboek kirolean lehen urratsak ematea du xede M Proiektuak. “Badakigu emakume asko kirola egitetik kanpo geratu direla denbora faltagatik, beldurragatik edo eroso sentitzeko espaziorik ez aurkitzeagatik. Udaletik irmoki sinesten dugu emakumeen ongizate integrala zaintzearen garrantzian, eta badakigu jarduera fisikoa hori lortzeko tresna indartsua dela”, azaldu du Irungo alkate Cristina Labordak. Alkatearekin batera, Goizane Álvarez Kulturako eta Kiroletako diputatua izan da aurkezpenean.
Programa pilotu bat da M Proiektua. Kirolera hurbiltzeko espazio seguru, inklusibo eta konfiantzazko batean bilakatzeko asmoa dute, horrela, beldurrak eta lotsak gainditzeko eta ongizateko fisikoa eta emozionala indartzeko. Emakumeen etxean burutuko da egitasmoa, eta bertaratutako emakumeen beharretara egokituko da.
Adierazi dutenez, funtsezko hiru oinarri ditu proiektuak:
- Erakartzea: emakume ez aktiboak aurkitzea eta laguntzea.
-
Orientazioa eta esku-hartzea: ingurune seguru batean eta genero ikuspegian prestatutako begiraleekin kirola egin dezaten sustatzea.
-
Bideratzea: kirol klub eta zentroetarako trantsizioa erraztea, parte-hartzaileek jarduera fisikoarekin modu autonomoan jarraitu ahal izan dezaten.
Alvarezen ustez, edozein adineko, jatorriko edo egoera fisikoko emakumeentzat zuzendutako proiektua da, kirola egitea edonoren “eskubidea” baita. “Proiektu honek gure kirol ereduaren funtsa irudikatzen du: kolaboratiboa, inklusiboa eta pertsonen bizitzan benetako eragina duen proiektua da. Irunen urrats garrantzitsu bat egin dugu gaur, eta gure asmoa da lurralde osora iritsiko den mugimendu baten hasiera izatea”, esan du Alvarezek. Horrez gain, gehitu du garrantzitsua dela emakumeen eta kirolaren artean dauden oztopoak “eraistea”.
Labordak adierazi du proiektua aurrera eramateko lekurik aproposena dela Emakumeen Etxea, bertan “emakumeak bidelagun eta seguru sentitzen direlako”. Alvarezen moduan, Labordak adierazi du proiektuak udalaren balioak partekatzen dituela: “Udalean lantzen ditugun balioetako asko islatzen ditu: berdintasuna, osasuna, autonomia eta komunitatea”.
