Urriko osoko bilkura emankorra izan da
Hondarribiko lehen hiri autobusa martxan jartzeko prest dago jada, eta tokiko merkataritza zerbitzuak indartzeko plana aho batez onartu dute.
Aurrez aurreko arreta zerbitzua etenda egon arren, gainontzeko komunikazio kanalak herritarren eskura daudela gogorarazi du udalak. Atzo arratsaldean (hilak 30) Hondarribiko Udaleko areto nagusian urriko osoko bilkura gauzatu zen. Bilkura positiboa izan zen herriarentzat, alderdi politiko guztien onespenarekin onartu zituzten herriko lehen hiri autobus zerbitzuaren esleipena, Hiri Merkataritza eta Zerbitzuen Biziberritze Estrategiaren Ekintza Plana, eta Klima eta Energiarako Alkatetza Itunari atxikimendua berritzea.
Hiri autobusari dagokionez, SS Bus UTE enpresari esleitu zaio zerbitzua, 1.331.820 euroko zenbatekoarekin. Kontratua bost urterako izango da eta sinatzen den unetik gehienez hiru hilabeteko epea izango du enpresak zerbitzua martxan jartzeko.
Bestetik, herriko merkataritza eta zerbitzu sarearen “lehiakortasuna, erakargarritasuna eta iraunkortasuna” indartzea helburu duen plana onartu dute ere.
Plana osatzeko herriko merkatariekin, Bidasoa Bizirikekin eta Amuitz elkartearekin elkartu da udala, eta elkarrekin Hondarribiko indargune eta erronka nagusienak identifikatu dituzte.
Batetik, tokian erosteko ohituraren gorakada, eskaintzaren kalitatea, eta elkarlan publiko pribatuaren prestutasuna idendifikatu dituzte. Eta erronken artean, gastuen ihesa, belaunaldi errelebo falta eta lokal hutsen areagotzea nabarmendu dituzte.
Herriko merkataritza eta zerbitzu sarea indartzen jarraitzeko eta erronkei aurre egiteko 30 ekintza zehatz ezarri dituzte eta horiek datozen hilabeteetan gauzatzen ahaleginduko dira udala, Bidasoa Bizirik eta Amuitz elkartea. Emaitzak ebaluatzeko merkataritza mahai batek jarraipen txostena gauzatuko du urtero.
Plana, batez ere, Auzo Bihotzak egitasmoan oinarritzen da. Egitasmo horrek bizitza sozial, ekonomiko eta komunitarioa berreskuratzeko helburua du, herrigune historikoaren “pisua arinduz” eta auzo bakoitza “erdigune txiki” bilakatuz.
Azkenik, Europako Batzordeak sustatutako eta EUDELek zein Eusko Jaurlaritzak babestutako alkatetza itunarekiko babesa berretsi dute udaleko alderdi politiko guztiek. Itunak udalaren helburuekin zein Parisko Akordioaren esparruan ezarritako klima helburuekin ere egiten du bat.
