Txinzerreko langileen lanuzte eta mobilizazioak, "jarraipen zabala"
Langileen Batzordeak salatu du enpresak hitzarmenaren negoziaketa mahaia edukiz hustu duela eta greba zein mobilizazioekin jarraituko duela "langileen lan baldintzak hobetu arte".
Txingudiko Zerbitzuak enpresako langileek bi orduko lanuztea egin dute gaur; are, Irungo udaletxe aurrean mobilizazioa ere egin dute. Gaurko egunaren balorazioa egin dute, eta jakinarazi dute lanuzte eta mobilizazioak “jarraipen zabala” izan duela. Langileek Batzordeak deitutako lanuztea eta elkarretaratzea izan dira; ELA eta LAB sindikatuetako ordezkariek dute bertan ordezkaritza.
Batzordekideek azaldu dutenez, martxoaren 24ko mahaian aurkeztu zuen aldarrikapen plataforma, eta, bertan, besteak beste, honakoak zerrendatzen dira: azken urteetan izandako eros ahalmenaren berrreskurapena, hitzarmenaren iraunaldirako KPIaren goitik dauden soldata igoerak, plusak, bajak %100 osatzean baldintzarik gabe, jardunaldi murrizketa, enpresak hitzarmena aplikatzeari uztea ekiditeko klausula, ordutegi, egutegi, baimen eta lizentziekin zerikusia daukaten hainbat aldarrikapen, telelana, taulan baliokideak diren kategorien ekiparazioa eta azpikontratazioa mugatzea.
Alabaina, azaldu dute hurrengo mahaia maiatzaren 16rako zegoela finkatuta, eta enpresak hitzordua bertan behera utzi zuela “unilateralki eta data alternatiborik proposatu gabe”. Enpresaren mungimendu hori, Langile Batzordearen hitzetan, “langileekiko errespetu falta” izateaz gain, onartezintzat jo zuten, eta “negoziaketa denboran luzatu eta oztopatzean ari zela” salatu zuen sindikatuak.
Gauzak horrela, Txinzerreko langileek “jarraipen zabala” izan zuten mobilizazioak abiatu zituzten. Ildo horretatik, kontatu dute ekainaren 10erako, enpresako zuzendaritza administrazio kontseiluarekin biltzekoa zen egunerako, paro eta mobilizazio berri bat deituta bazegoen ere, bertan behera utzi zutela egindako presio eta mobilizazioei esker ekainaren 13rako negoziaketa mahai bat jartzea lortu zutelako. “Baina bilera horretan enpresak negoziaketa edukiz hustu zuen Administrazio Kontseiluak ezarritako irizpideak aitzakiatzat hartuta soldata bezalako gai estruktural eta garrantzitsuak negoziazio esparru horretatik ateraz. Enpresak Udalhitz edota Irungo Udaleko akordio ezberdinak erreferentziatzat dituela behin eta berriro esan arren errealitatea bestelakoa da, Txingudiko Zerbitzuak-eko langileen soldatak Irungo Udaleko soldatetatik oso urrun baitaude”.
Ondorioz, gaur bi orduko lanuztea eta Irungo udaletxearen aurrean “mobilizazio arrakastatsua” egin dutela azaldu dute, “enpresako zuzendaritzari beraien lan baldintzak hobetuko dituen hitzarmenaren negoziaketa martxan jartzeko galdegiteko eta udal ordezkariei zentzu horretan bultzatzeko eskatzeko”.
Hortaz, langileekiko errespetuz eta arduraz jokatzeko eta edukiz betetako “negoziaketa zintzo bat” aurrera eramateko eskatu diote enpresari. Bide horretan, gainera, jakinarazi dute greba eta mobilizazioak bultzatzen jarraituko dutela “Txingudiko Zerbitzuak-eko langileen lan baldintzak hobetuko dituen hitzarmena lortu arte”.
Langileek jakinarazi dute azaroaren 5ean lanuztea egingo dutela 10:00etatik 12:00etara, eta elkarretaratzea egingo dutela Hondarribiko Batzoki aurrean, 10:30ean. Gainera, azaroaren 10ean egun osoko greba egingo dutela ere aurreratu dute, eta mobilizazioak ere egingo dituzte, baina aurrerago emango dituzte horien xehetasunak.
