Aireportuak ezaugarri bereziduneko higiezinen gaineko zerga kobratzea jarri du mahai gainean EH Bilduk
Araban, Bizkaian eta Nafarroan udalez gaindiko dimentsioa duten azpiegiturek ezaugarri bereziduneko ondasun higiezinen gaineko zerga (EBOH) ordaintzen dute. Gipuzkoan ere kobratu ahal izateko beharrezkoan diren neurriak hartzeko eskatu du koalizio subiranistak.
Araban, Bizkaian eta Nafarroan udalez gaindiko dimentsioa duten azpiegiturek ezaugarri bereziduneko ondasun higiezinen gaineko zerga (EBOH) ordaintzen dute, hain zuzen, eremu zabalagoko herritarrei zerbitzua emateaz gain, kokatuta dauden udalerriengan eragin zuzena dutelako. Gipuzkoan, ordea, ez da ezaugarri bereziduneko ondasun higiezinen gaineko zergarik kobratzen.
Hondarribiaren kasuan, ofizialki Donostiako aireportua den azpiegiturak eragin zuzena du udalerriarengan eta bertako herritarrengan. Euskal Herriko hirugarren aireportu nagusia da Hondarribikoa, Loiuko eta Biarritzeko aireportuen atzetik, eta urtero 300.000 bidaiari inguruk erabiltzen dute azpiegitura hori.
Aireportuak zerga hori ordaindu dezan ahalbidetzeko, Gipuzkoako Foru Aldundiak arauak eguneratu beharko lituzkeela adierazi du Hondarribiko EH Bilduk eta horretarako “borondate politikoa” eskatu die arduradunei urtea amaitu baino lehen Gipuzkoan ere zerga hori kobratu ahal izateko beharrezkoan diren neurriak hartzeko.
