Igandeko indarkeria matxista kasuaren aurrean adierazi da udala
Adierazpen instituzionala zabaldu dute, eta elkarretaratze deialdia egin, gaur 19:30earako.
Indarkeria kasu baten aurrean egindako elkarretaratzea, Irunen. Igandean Irunen izandako indarkeria matxista kasuaren aurrean, bere gaitzespena erakutsi du Irungo Udalak. Adierazpen instituzional bat zabaldu dute. “Babesa eta gertutasuna adierazten diogu biktimari eta haren ingurukoei, eta haien esku uzten ditu udalak dauzkan informazio eta baliabide guztiak, osatzeko eta berreskuratzeko prozesuan behar izan ditzakeenak”, adierazi du udalak ohar bidez.
Arreta “ziurtatu eta jasotako informazioa baloratu” ondoren, Irungo Udalak erabaki hauek hartu ditu: erasoa instituzionalki gaitzetsi eta herritar guztiei bide bat eskaini indarkeriazko ekintza hauek arbuiatu dezaten. “Horrelako erasoak emakume guztien askatasunaren aurkako ekintzak dira, eta emakumeen kontrako indarkeriak erasotzaile eta biktima banakoak ditu, baina emakumeak kontrolpean eta mendean betikotu nahi dituen egiturazko arazo bat du jatorrian”.
Udalak argi dauka indarkeria hori ez dela gertakari isolatuen emaitza. “Aitzitik, genero-aurreiritzietan oinarritutako sozializazio baten ondoriorik larriena eta lazgarriena da. Izan ere, sozializazio horrek emakumeak desberdintasun materialeko egoera batean mantentzen dituen gizartearen antolamendu baten aldeko giroa sortzen du, eta horrela emakumeen bizitzak prekarizatzen dira eta ez dira aitortuak gizonen pareko herritar gisa, eta beren oinarrizko eskubideak baliatzeko oztopoak jartzen zaizkie”.
Elkartasuna indarkeriaren aurrean
Irungo Udaleko Berdintasun Batzordeak adierazi du erasoaren aurkako indarra erakusteko elkarretaratzea egingo dutela gaur, 19:30ean, San Juan plazan. Berdintasun Kontseilua osatzen duten elkarteekin batera (Argoiak, Arrats, Bidasoako Elkarte Feminista, Gaurko Andreak, Irungo Emakumeen Etxea, Txingudi Elkarte Feminista eta Uxoa) egingo dute.
