Neguko 25.000 landare inguru landatuko dituzte hirian zehar
Landare aldaketak egiten hasi dira, eta Ibarlako mintegian hazitako 38.618 landareetatik, 25.617 jarriko dituzte kalean.
Neguko loreak landatzen hasi dira udaleko lorezainak. Urtean zehar, Ibarlan kokatuta dagoen udal mintegian hazi dira landareak, eta orain, kaleetara aldatuko dituzte. 38.618 landare hazi dira mintegian, eta 25.000 inguru landatuko dituzte. Besteak, hazitokian mantenduko dituzte, neguan zehar kalekoek ordezkapenak behar badituzte.
Irungo Udaleko Obretako, Mantentze Lanetako eta Azpiegituretako arloko ordezkari Gorka Alvarez, udal mintegiko arduradun Idoia Martin eta Gurea enpresa esleipendunaren ordezkari Jaime Aperribay Larreaundi auzoan elkartu dira neguko loreen proiektua aurkezteko. Alvarezek udal langileen lana azpimarratu nahi izan du: “Udal mintegian landare eta loreak zaintzen dituzte, eta gero berdeguneetan landatzen dira hiria biziberritzeko. Haien lanaren ondorioz, onura ekologikoak eta ingurumenerakoak dakartzate landareek, eta osasun fisiko eta mentalerako onak dira”.
Tulipa, anemona, antirrhinuma, ziklamena, mitxoleta, oroilorea, udaberri lorea, bioleta eta biola landareak landatuko dituzte orain hasi eta maiatzera bitartean. Gehien landatuko dena oroilorea izango da: 8.580 landare, hazitakoen %22,2. Horiek San Juan plazan, Luis Marianoko lorategietan eta Zubi Muxu plazan jarriko dituzte. Bioletak izango dira bigarren landatuenak. Horiak, laranjak, arrosak eta urdinak ikusi ahalko dira, San Juan plazan, Oiasso museoan eta hainbat jardinetan.
Herritarren laguntza
Gureak berdea gizarte ekimeneko enplegu zentro bereziaren ardura da hiriko parke eta berdeguneak mententzea, zaintzea eta hobetzea. Irunen sasoi bakoitzean aldatzen diren loreak hazteaz haiek arduratzen dira, mintegian lan eginez.
Orain aldatzen ari diren landareak, hau da, uda sasoikoak, berrerabili eta herritarrei banatuko zaizkie udaberrian, zehazki, maiatzean. Herritarrei begira Alvarezen ustez, garrantzitsua da haiek ere lorategiak zaintzea. “Pedagogia lan behar garrantzitsua dugu, herritar guztiok lorategiak zaindu ditzagun eta itxura ezin hobea izan dezaten beti”.
