25 urte beteta, erreferente bilakatu da FICAB
Nazioarteko Zinemaldi Arkeologikoaren 25. urteurrena egingo dute gaur, beste edizio batekin. 24 flim hautatu dituzte, eta azaroaren 10etik 15era egingo dute.
Nuria Alzaga eta Aizpea Goenaga. Aurtengo FICAB Nazioarteko Zinemaldi Arkeologikoa aurkeztu dute, bereizgarritasun batekin: 25. urteurrena da aurtengoa. Mundu mailako zinemaldi arkeologikoen barnean esanguratsua bilakatzen ari da FICAB, eta urtero, arkeologia arloko profesional asko bertaratzen dira Irunera. “Horrelako gauzak normaltzat hartzen ditugu, baina ekitaldi handiak dira, eta kasu honetan, ia bakarrak”, azaldu du udaleko kultur zinegotzi Nuria Alzagak. Azaroaren 10ean hasiko dute zinemaldia, eta 15eraino iraungo du.
Nazioarteko hainbat pelikula ikusteko aukera izango da, hala nola Errusiakoak, Saudi Arabiakoak eta Txinakoak. Guztira 24 film hautatu dituzte. Halere, pelikulen izenak eta programazio osoa oraindik ez dute iragarri. Aizpea Goenaga Oiasso museoko zuzendariak adierazi du ohore bat dela haientzat Jesus Cimarro epai mahaian edukitzea: “Iaz Dies Oiassonisean egon zen Jesus, eta orain FICABean edukiko dugu. Ikaragarria da”. Cimarrorekin batera Ana Belén Marín-Arroyo, Kantabriako Unibertsitateko historiaurreko katedratua , Juan Manuel García-Ruiz, Ikerbasqueko irakaslea Donostia International Physics Centerrean, Giulia Pruneti, Florentziako Archeofilm Festivaleko zuzendariordea eta Mertxe Urteaga, Oiasso museoko zuzendari ohia eta zinemaldiaren sortzaileetako bat.
Aurten, emanaldi guztiak Amaia kultur zentroan izango dira, eta Azalgak zehaztu du proiekzioak areto handian egingo direla. Iaz, Amaiako obrak zirela eta Mendibileko zinema aretoetara eraman zuten zinemaldia. 25. urteurrena izanik, zinegotziak adierazi du urte “berezia” izango dela. Sari nagusia 2.000 eurokoa izango da, ikusleen sari berezia 1.000 eurokoa. Genero ikuspegiaren EITB saria 1.000 eurokoa, hezkuntza saileko saria 750 eurokoa eta Arkeolan saria sari ekonomikorik gabekoa.
