Hondarribiko Udalak indarkeria matxista kasu bat salatu du
Elkarretaratzea egingo dute bihar, 18:00etan Martxoak 8 plazan.
Azken astean Hondarribian izandako indarkeria matxista kasu bat salatu du udalak. Erasoaren aurrean gaitzespen “gogorrena” erakutsi nahi izan du udalak, eta horrez gain, elkartasun osoa adierazi nahi izan dio erasotua izan de emakumeari. “Udalak baliabide guztiak jarri ditu bere esku, baita bere onera etortzeko prozesuan behar izan dezakeen laguntza guztia ere”, adierazi du udalak ohar bidez.
Erasoaren berri izan duenetik, udalak indarkeria matxistaren aurkako lan talde teknikoa lanean jarri du, informazioa biltzeko eta biktimari behar duen arreta emateko. “Arreta egokia bideratu dela ziurtatu eta informazioa baloratu eta gero, Hondarribiko Udalak honako erabaki hauek ditu: alde batetik, aho batez eta jendaurrean Udalaren jarrera irmoa adieraztea, argi eta garbi esateko ez dugula inola ere onartzen emakumeen eskubideen aurka egiten duen edozein eraso; eta, bestetik, herritar guztiei bide bat eskaintzea, gaitzespen argi bat agertu dezaten emakumeen aurkako indarkeriaren aurka”.
Udalaren ustez, indarkeria matxista gizartearen egituraren arazoaren ondorio argi bat da, “emakumeen gaineko kontrola eta nagusitasuna betikotzea helburu duena”. Horrez gain, indarkeriak “ezin dira ulertu” ekintza bakartu edota azalpenik gabeko gisa, eta “generoen gaineko aurreiritziak, gizartean aski errotuta dauden horiek dira, hain zuzen, halako ondorio larri eta tamalgarrien sortzaile”. Udalaren ustez, gizarteak ez ditu emakumeak herritar osotzat hartzen, gizonezkoen maila berean, eta ez die aukerarik ematen oinarrizko eskubideen jabe izateko.
Datu bortitzak
Hondarribiko indarkeria kasuaz gain, udalak aurreko astean Zarautzen gertatutakoa gaitzetsi du. “Urtea hasi zenetik Euskal Herrian izan den seigarren erailketa matxista izan da. 131 dira Euskal Herrian 2003tik erregistratutako hilketa matxistak.”
Amaitzeko, elkarretaratze deialdia plazaratu dute. Bihar, 18:00etan egingo dute, Martxoak 8 plazan.
