Hamabost agente batuko dira Irungo Udaltzaingora bi urteko epean
104 Udaltzaingo daude orain Irunen, eta kopuru hori 119ra igoko dute. 2025a bukatu baino lehen sortuko dituzte lehen zortzi postu berriak.
Urriko ohiko osoko bilkuran Irungo Udalak Udaltzaingoko pertsonala “pixkanaka” handitzea proposatuko du; %15 handitu nahi dute pertsonala, eta helburua da 2027an hamabost agente gehiago izatea. Hortaz, Udaltzaingoko plazen kopurua 104tik 119ra igoko dute “hiriko segurtasun eta bizikidetza beharrei erantzuteko”.
Erabaki hori Bizikidetzaren eta Segurtasunaren aldeko itunaren esparruan hartutako konpromisoen barruan dago, eta hurrengo batzorde iraunkorrak egingo duen datorren bilkuran landuko dute. Hogei pertsona inguruk osatzen dute aipatutako batzordea, eta hilaren 28an (asteartea) bilduko dira.
Udalak aipatu duenez, “Udaltzaingo moderno, eraginkor eta gertukoagoa izatea da helburua, kalean gehiago ibiltzea eta delituei aurrea hartzeko prebentzioan eta delituen kontrako zuzeneko esku hartzean oinarritzea; alegia, Udaltzaingoa herritarren zerbitzura egotea, bizikidetza eta segurtasuna hobetzeko”.
Igoera hori ez dute, baina, bat batean egingo, apurka apurka baizik, eta lehen urratsa izango da 2025a amaitu baino lehen zortzi postu berri sortzea, honakoak, hurrenez hurren: komisario burua, komisario ordea, bi ofizial, bi ofizial orde eta bost agente. Alabaina, 2026 eta 2027 urteetan agenteentzako beste zazpi postu sortuko dituzte.
Cristina Laborda, Irungo alkatea: “Segurtasuna nire lehentasun nagusia da, eta halaxe izango da aurrerantzean ere. Oso garbi dut irundarren kezka iturri nagusia dela, eta, horregatik, pertsonala handituta, beste pauso bat eman nahi dugu Irun hiri seguru izan dadin, lasai bizitzeko moduko hiria”.
Iñigo Berges Herritarren Segurtasun eta Bizikidetzarako ordezkariak ere hartu du hitza agerraldian, eta kontatu du berregituraketa horrek Udaltzaingoaren baliabideak “hobeto antolatzea” ahalbidetuk duela “hirian segurtasun hobea eta handiagoa bermatzeko helburua betez”.
Antolamendu berri horrek bi operatibo nagusi izango dituela jakinarazi dute: batetik, Herritarren Segurtasunerako Unitatea, eta, bestetik, Trafiko, Ordenantza eta Bizikidetza Unitatea.
Pertsonalaren hazkunde hori 2025eko aurrekontuaren barruan aurreikusitako marjinen barruan diseinatu dute.
