Beñat Elzo, hamargarren aldiz
Aurten, ATR-X elkartera bideratuko dituzte irabaziak. Antolatzaileen esanetan izen ematea martxa onean doa, baina oraindik aukera badago.
Hegoi Martin, Lupe Queiruga, Beñat Olazabal eta Juan Antonio Garcia. Hamargarren Beñat Elzo mendi lasterketa aurkeztu dute gaur. Azaroaren 1ean egingo dute, urtero moduan. Oraingoz izen emate kopuru ederra lortu dutela adierazi du Beñat Olazabal lasterketako antolatzaileetako batek. 270 lagunek eman dute izena oraingoz lasterketan, eta guztira, ibilaldiak barne, 800 pertsona inguru dira. “Oraindik izena emateko epea irekita dago, 28ra arte, baina jendea animatu nahi dugu garaiz apuntatzera, azken momenturaino ez itxoitearren”, adierazi du Olazabalek.
Ordutegi berberak errespetatuko dituzte. 09:00etan ibilaldiko partaideak martxan jarriko dira, 11:00etan lasterketakoak atera dira, eta, azkenik, eta 12:30ean familien ibilaldia egingo dute. Aurten, ATR-X gaixotasunaren izen berbera duen elkarte batera bideratuko dute dirua. Hegoi Martin elkartearen ordezkaritzapean mintzatu da: “ATR-X sindromea duen haur baten aita naiz ni. Gaixotasun genetiko bat da, gehien bat mutikoetan ematen dena. Desgaitasun intelektuala eragiten du gaixotasunak, eta horren ondorioz, ikasteko arazoak edota hitz egitea ia ezinezkoa izatea eragiten ditu”. Duela urtebete sortu zuten elkartea, sindromea duten haur batzuen gurasoak elkartuz.
Elkarteak helburu argiak ditu. “Gaixotasun arraro bat izanez, ikerketa gutxi gauzatu dira orain arte, eta hori da gure helburuetako bat, ahal dugun moduan ikerketak sustatzea”, esan du Martinek. Horrez gain, gaixotasunaren ikusgarritasuna indartzea ere apustu garrantzitsua da haientzat.
Bereizagarritasuna duen lasterketa
Lupe Queiruga kirol zinegotziak eskerrak emateko erabili du bere txanda. “Beñat Elzo lasterketako antolatzaileei eskerrak ematea tokatzen zaigu. Lan ikaragarria egiten dute, eta lasterketa honetan bereizgarriena helburua da. Gaixotasun arraro bat horrela nabarmentzea oso garrantzitsua iruditzen zaigu”. Zinegotziaren ustez, beharrezkoa da horrelako egitasmoak aurrera eramatea, ariketa fisikoa sustatzeko, eta era berean, gaixotasun arraroei ikusgarritasuna emateko.
Azkenik, Sport Mundiko Juan Antonio Garciak hartu du hitza. “Aurten Sport Mundiren 25. urteurrena ospatzen dugu. Kirolaren, elkartasunaren eta gizarte eraldaketaren eragile bilakatu gara gure ibilbidean, eta horren adibide handia da Beñat Elzo lasterketa”.
