Egin daiteke San Tomasetan txosna jartzeko eskaera
Hilaren 31 bitartean izango da eskaria aurkezteko epea, eta onartutako eskabideen artean zozketa azaroaren 12an egingo dute.
Orotara, sei txosnarentzako tokia izango da Urdanibia plazan. Irungo Udaleko Kultura zerbitzuak jakinarazi duenez, zabalik dago San Tomas egunean Urdanibia plazan txosnak jartzeko eskaerak aurkezteko epea. Kultura, kirol, jolas edota gizarte arloko Irungo erakunde edota elkarte guztientzat dago zabalik deialdia, eta hilaren 31 arte (ostirala da) izango dute aukera eskaera egiteko.
Onartutakoen zein baztertutakoen zerrenda azaroaren 6an argitaratuko dute, eta alegazioa aurkezteko hiru egun natural izango dituzte hala nahi dutenek; Ospitale Zaharreko kultura zerbitzuan, HAZen edota Irungo Udalaren webgunean aurkeztu beharko dira horiek. Epe hori amaitutakoan ez badago inolako erreklamaziorik, behin-behinekoak diren zerrendak behin-betikotzat hartuko dituzte.
Alabaina, onartutako txosnen artean zozketa egingo dute azaroaren 12an, 19:00etan, Amaia KZko hitzaldi aretoan, eta eskatzaileek bertan egon beharko dute. Gehienez sei postu esleituko dituzte.
Onartutako eskabideak lau multzotan sailkatuko dituzte: kultur elkarteen eskabideak, kirol elkarteenak, gazte elkarte zein ikastetxeenak eta elkarte sozialena eta gobernuz kanpoko erakundeenak.
Oinarriak Herritarrentzako Arreta Zerbitzuaren bulegoetan eta udalaren webgunean eskuratu daitezke; eskabideak, berriz, HAZen aurkeztu behar dira.
