Antzinako objektu, bilduma eta Vintage azoka, asteburuan, Ficoban
Hilaren 25 eta 26an egongo da azoka hori Ficobako 2. pabiloian. Lau euroko sarrera bat erosi behar da, baina bi egunerako balio du.
Nougrupfiral enpresak sustatutako egitasmoa da Antzinako objektu, bilduma eta Vintage azoka, eta asteburu honetan Irunen egingo du geldialdia. Ficobako 2. pabiloian jarriko dute azoka, eta 40 enpresa eta 40.000 pieza baino gehiago elkartuko dira bertan. Antolatzaileek labur definitu dute azokaren izaera: “Azokara hurbiltzen direnek iraganera benetako bidaia bat egiteko aukera izango dute”.
Beste gauza batzuen artean, honakoak dira nabarmentzen diren piezak: portzelanak, altzari zaharrak, lanparak, bitxiak, vintage arropa, panpina, diskoak, txanponak, zigiluak, liburuak…
Era berean, antolatzaileek nabarmendu dute edonork saldu dezakeela “pieza interesgarriren bat”; horretarako, objektuaren argazki bat erakutsi beharko da, eta irudiarekin aztertuko dute erakusketariek haren balioa.
Azoka hilaren 25 eta 26an (larunbat eta igandean) egongo da ikusgai; larunbatean 11:00-21:00 artean egongo da bisitatzeko aukera, baina, igandean, berriz, 11:00etatik 20:00etara. Azokara sartzeko lau euroko sarrera ordaindu beharko da, baina bi egunetarako balio du txartel horrek.
Azkenik, aipatu dute aparkalekua doakoa izango dela.
