Asteburu gazi-gozoa Urgarako kirolarientzat
Emakumeek ekarri dituzte asteburuko albiste onenak. Nagusiek eta mutil jubenilek lehia izan dute, emaitza gazi-gozoekin.
Asteburu onena izan ez bada ere, garaipen handi batekin eta sentsazio onekin itxi dute asteburu hau Urgara Txingudi klubeko kideek. Bi talde nagusiek eta jubenil mutilek lehia izan dute, emaitza gazi-gozoekin.
Emakume seniorrak oso fin aritu dira. Logroño izan dute aurkari, etxetik kanpo gainera. Hasieran zailtasunekin aritu arren, markagailua iraultzeko gai izan ziren, nola gainera. 19-4 bukatu zuten partida. Igandean, gainera, bigarren partida bat jokatu zuten, Iruña B-ren kontra hain zuzen. Bigarren honetan, tamalez, ez ziren irabazteko gai izan, aurkari gogorrak baitira iruindarrak. 7-15 bukatu zuten norgehiagoka.
Gizonezkoen senior taldea ez da hain fin aritu, aurkari gogorra izan baitu: Larraina. Hasieratik partida zaila izango zela jakitun ziren Urgarako gizonak. Partida nahiko berdinduta hasi zuten, baina hirugarren denboran markagailua aurkarien alde jartzen joan zen. 13-5 bukatu zuten partida.
Mutil jubenilak ere Logroño izan zuten aurkari, eta oraingoan ere ez ziren gai izan. 8-13 galdu zuten partida.
