Irungo Atsegiña, musaren epizentro
Datorren astelehenean jokatuko dute LXVI. Irun Hiria Mus Txapelketa elkartearen egoitzan. Ordura arte izango da izena emateko aukera.
Lehia estua espero da aurten ere. Irungo Atsegiña elkartearen klasikoetako bat bueltan da, heltzear baita Irun Hiria Mus Txapelketaren aurtengo ekitaldia. Datorren astelehenean (hilak 27) ekingo diote 66. edizioari. Gure kultura herrikoian hain errotuta dagoen kirol honen zaleak, beraz, adi egon eta azkar ibili daitezela. Urtero bezala, elkartearen egoitza izango da agertoki edo jokaleku nagusia. 20:00etan hasiko da lehia.
Elkartekoen arabera, txapelketa honek ez du soilik musaren balioa nabarmentzen, “belaunaldiz belaunaldi jokalarien arteko lotura sendotzea” ere baita antolatzaileen helburua. “Historia luzeko ibilbidearekin, Irun Hiria Mus Txapelketak erakusten du tradizio onak ez direla galtzen, urtez urte berritzen direla baizik, betiko espiritu berarekin: adiskidetasuna, lehiakortasun osasuntsua eta jokoarekiko zaletasuna”, esan dute elkartekoek, txapelketa iragartzeko kaleratu duten oharrean.
Txapela eramaten duenak 600 euroko saria jasoko du, eta horrez gain, Glorioso Magnun botilak ere eramango ditu etxera. Sari nagusiaz gain trofeoak, bazkariak eta ardo kutxak zozkatuko dira hurrengo sailkatuentzat.
Bikote bakoitzak 70 euro ordaindu beharko ditu lehian parte hartzeko. Izen emateak asteleheneko 12:00ak arte egin beharko dira, honako emailera idatzita.
