Landa eremuan zein hirietan emakumeen rola aitortzearen garrantzia azpimarratu du Labore Txingudik
Herritarrei tokiko ekoizleak babesteko dei egin diete Labore Txingudi elkartekoek; baita kontsumo kontzientea sustatzera ere.
View of a crop field at sunset Elikaduraren Munduko Eguna da gaur; atzo, berriz, Landa Eremuko Emakumeen Nazioarteko Eguna, eta Labore Txingudi elkarteak azpimarratu du bi egun seinalatu horiek bata bestearen ondoan egotea ez dela kasualitatea: “Elikadura sistemaren oinarrian emakumeen lana, jakintza eta zaintza daude, eta gaien ahotsa eta eskubideak erdigunean jartzea ezinbestekoa da justizia sozial eta ekologikoa lortzeko”, diote.
Era berean, nabarmendu dute landa eremuko emakumean elikadura burujabetzaren zutabeak direla; hala nola, nekazaritzan, artisau ekoizpenean, zaintzan eta komunitatearen sosteguan. “Haien lanari esker mantentzen dira tokiko ekoizpena, bioaniztasuna eta belaunaldien arteko jakintza. Hala ere, emakume askok oraindik ez dute behar duten aitortza, erabaki guneetan lekua ezta lan baldintza duinik ere”, jarraitu dute.
Elikadura “eskubidea” dela diote, eta, ondorioz, “komunitatearen ardura” dela. Gauzak horrela, elikadura bidezkoago, jasangarriago eta feminista baten alde egiteko “beharrezkoa da emakumeen rola aitortzea eta haien lidergoa indartzea, landa eremuan zein hirietan”.
Era berean, kontatu dute Ekofeminismotik begiratuta elikadura eta zaintza uztartzen dituen ikuspegia integrala proposatzen duela, lurra, gorputzak eta komunitatea erdigunean jarriko dituen eredu baten alde, alegia. Alabaina, horretarako funtsezkotzat jotzen dute tokiko ekoizpenaren eta kontsumo arduratsuaren aldeko sareak sendotzea, eta emakume ekoizleen ahalduntzea.
Hortaz, Bidasoako emakume ekoizle guztiak omendu nahi dituzte: eguneroko lanarekin mahaiak elikatzen dituztenak, tokiko ekonomiari bizitza ematen diotenak eta elikadura burujabetzaren aldeko komunitate bizi baten oinarria direnak. “Haien jakintza, ausardia eta elkartasuna dira gure eskualdeko agroekologia eta jasangarritasunaren bihotza”.
Azkenik, herritar guztiak deitu dituzte tokiko ekoizleei babesa ematera, “kontsumo kontzientea sustatzera eta elikadura bidezko, osasungarri eta solidario baten aldeko urratsak elkarrekin egitera”.
