Hondarribiko ikasleak, Xaren, euskarazko kultura digitalean sakontzen
Egitasmoaren xede da gazteen artean euskarazko sorkuntza eta baliabide digitalak ezagutaraztea. Talaiako DBH4ko ikasleak izan dira bertan.
Baionan izan diren Talaiako ikasleetako batzuk. Gaur, hilak 16, Xare Euskarazko Kultura Digitalaren Jardunaldiak egin dituzte Baionan. Egitasmoaren xede da gazteen artean euskarazko sorkuntza eta baliabide digitalak ezagutaraztea. Hala, partaideen artean Hondarribiko DBH4ko Talaia ikastetxeko kideak daude; haiekin batera Baionako eta Doneztebeko ikasleak dira, 271 dira orotara.
Gazteak, informazioaren eta komunikazioaren teknologiak, eta euskara dira jardueraren ardatz. 2025-2026 ikasturtean, Baionakoaren antzerako beste bederatzi topaketa egin, edo egingo dituzte. Oarso Bidasotik hurbilen den hurrena Errenteria-Oreretan egingo dutena da, azaroaren 27an. Baionako saioa ON! proiektu euskaltzaleak, Mundu Berriak berrikuntza sexologikorako irabazi asmorik gabeko erakundeak, eta Eragin Komunikazioak antolatu dute elkarlanean, eta Akitania Berria – Euskadi – Nafarroa Euroeskualdeak babestu du diruz.
“Musika autoekoizteko hastapen-lanabesak, argazki-teknika berriak, robotika, bideojokoak, errealitate birtuala, app-ak nork bere neurrira sortzeko lanabesak, Adimen Artifiziala… askotarikoak dira gazteek jorratu dituzten gaiak”, zehaztu dute antolatzaileek. Hitzaldi eta lantegi formatuko jarduera horiek euskarazko unibertso digitala elikatzen diharduten profesional eskarmentudunek gidatu dituzte.
Berritasun modura, sare sozialetan izaten diren egoera errealen gaineko azterketa egin dute ikasleek adituekin: “Gorroto diskurtsoak antzemateko, ligatzerakoan red flag eta green flag seinaleak identikatu dituzte, sexting-ari buruz gogoeta egin eta fake news edo gezurren aurrean nola jokatu hausnartuko dute, besteak beste”.
Talaiakoak, gustura
Talaia BHIko DBH4ko hainbat ikasle izan dira gaur Baionan. Gustura dira bizi izan duten esperientziarekin. Hodei Enparan Mendesek, adibidez, ikasgaia atera du gaurko jardunalditik: “”Gazteoi beti esaten digute kontuz ibiltzeko teknologiarekin eta mundu digitalarekin, baina XAREn ikusi dugu teknologiak badituela alde on asko”.
Luka Martin Saizek, bere aldetik, esan du argazkilaritza tailerra izan duela bereziki gustuko, eta egunerokoan esku artean gazteek izaten duten sakelako telefonoari probetxu handiagoa ateratzen ikasi duela: “Telefonoarek kamerarekin argazki onak egiten ikasi dugu, flasha ongi erabiltzen. Beste batzuk gamer gelan ibili dira, euskarazko bideojokoetan jokatzen”.
Ekhi Larrak aipatu du sare sozialetan ibiltzen dela, eta eduki asko euskara ez diren beste hizkuntzetakoak direla: “Baina euskaraz ere idazten du jendeak. Nik beti euskarazko musika aukeratzen dut, adibidez”.
