Goizean elkarretaratzeak, arratsaldean burrunbak
Goizerako lanuzteak deitu dituzte sindikatuek, eta eragileek arratsalderako mobilizazio zaratatsuak. Hemen horien zerrenda, herriz herri. HITZAko langileek ere lanuztea egingo dute.
Palestinako herriarekin bat egiteko eguna izango da gaurkoa (hilak 15, asteazkena). Sindikatuen partetik, deialdi orokorra goizeko lanuztera joatekoa izan da deialdia, baina irakaskuntzarako egun osokoa izatea da proposamena. Arratsaldean, berriz, herrietako eragileek deitu dituzte elkarretaratzeak eta manifestazioak, burrunba kutsukoak denak. Beheko zerrendan, HITZAk orain arte bildu dituen deialdiak, Irungoak eta Hondarribikoak. Donostiako Bulebarretik 12:30ean abiatuko den manifestazioa izango da herrialdeko mobilizazio nagusia.
Sindikatuen artean, LAB, CCOO, UGT, ESK, Steilas, CGT/LKN, Solidari, Etxalde eta Hiru sindikatuek deialdi bateratuak egin dituzte goizerako Oarsoaldeko hainbat tokitan (behean zerrenda). ELAren deialdia, berriz, Oarso Bidasoa mailakoa izango da, eta Errenteria-Oreretan egingo dute 12:30ean hango Herriko Plazan.
HITZAko langileek ere lanuztea egingo dute goizean. Horregatik, goizean izango diren mobilizazioak ez dituzte kubrituko, horien partaide izango direlako. Hori horrela, enpresetako, ikastetxeetako, edo bestelako eragileetako kideek egindakoaren berri eman nahi badute, horien azalpenak eta irudiak HITZAra bidaltzeko aukera dute, gerora publikatuko ditu horiek euskarazko tokiko hedabideak. Horiek posta elektronikoz bidali behar dira (egin klik hemen posta helbidearen berri izateko).
Goizeko elkarretaratzeak
Irun
- 11:00. FCC Txingudiren aurrean.
- 11:00. Tesako biribilgunean.
Hondarribia
- 11:00. Endanearako sarreraren ondoan.
Arratsaldeko deialdiak
Irun
- 19:00. San Juan plazatik abiatuta, manifestazio zaratatsua.
Hondarribia
- 20:00. San Pedro kalean, kazerolada.
