Txaranga topaketa egingo dute larunbatean, Irunen
Hilaren 11n (larunbata) izango da hitzordua, eta 12:30ean hasiko da egitaraua. Hiriko zein kanpoko txarangak ariko dira egunean zehar.
Gauerdi txarangaren Instagrameko irudi bat. @gauerditxaranga / Instagram Larunbat honetan ospatuko dute Irunen Txaranga Topaketa, eta, izenak dioen moduan, helburua hiriko kaleak musika doinuekin alaitzea izango da.
Hamar ordu baino gehiago dituen programazioa ondu dute astebururako, eta 12:30ean emango diote hasiera egitarauari. Lehenbizi Peña Poteo, Gauerdi, Irungo Atsegiña eta Fanfarria El Despiste hiriko txarangen txanda izango da, eta, gero; 14:00etan, Foru kaletik abiatuko den kalejirarekin elkartuko dira.
Arratsaldean, berriz, hirira gonbidatu dituzten txarangen txanda izango da: 17:00etan Iruñeko Gazte Txarangak egingo du saioa, eta 19:00etan Segoviako Jaleo Txarangak. Egunari amaiera emateko, gaueko hamabietan Madrileko Fugitivos txarangak egingo du saioa.
