Minbiziaren aurka egingo du Bidashopek
Programazioz beteriko larunbata prestatu dute Irungo Zabaltza plazan, minbiziaren aurka egiten duten eragileen alde dirua biltzeko.
Minbiziaren aurka elkartuko dira larunbatean (urriak 11) Irungo Zabaltza plazan. Hainbat aktibitate programatu ditu Bidashop elkarteak, eta horien xedea dirua biltzea da, ondoren minbiziaren aurka egiten duten ikerketetara bideratzeko. Programazioa arratsaldeko 16:00etatik 19:00etara izango da.
Santiagoko Deabruak elkarteko kideek jolasak prestatuko dituzte umeentzat. Adin guztientzat zuzendutako arratsaldea izatea nahi dute. Ondoren, herriko ile apaintzaile talde batek ilea moztu egingo du, donazioak bilduz. Arratsaldean zehar, hainbat mahai informatibo egongo dira, prebentzioari, osasunari eta laguntzari buruz informazioa jasotzeko, beti ere minbizia oinarri hartuz. Musika ez da faltako, Ainhoa dantza eskolako ikasleek dantza eta musika ikuskizun bat eskainiko dutelako. Azkenik, puzgarri arroxak botako dituzte, eta aldi berean opariak banatuko dituzte.
Bidashopek antolatutako programazioa ez da soilik larunbatera mugatuko. Urrian zehar, Bidashopekin atxikitako komertzioetan itsulapiko bana egongo da, donazioak jasotzeko.
