Zaisa Txingudik garaipena lortu du Euskal Ligako lehen jardunaldian
Zaisa Txingudiz gain, 10, 12, 14, 16 eta 18 urtez azpiko neska mutilek ere izan dituzte denboraldi hasierako partidak asteburuan.
Argazkia: Fermin Garaioa Pasa den asteburuan eman diote hasiera Euskal Ligari, eta pozik da Zaisa Txingudi taldea, Iruñan ligako lehen jardunaldia irabazi baitu. La Unica taldearen aurka lehiatu ziren, eta 10-25 irabazi zuten norgehiagoka.
Emaitza horrekin lau puntu gehitu dituzte Txingudikoek. Honakoa izan zen garaipena lortu zuen hamabostekoa: Jon Sanchez, Aitor Asurmendi, Joao Costa, Iñaki Cano, Asier Amigo, Jon Mediavilla, Aritz Rodriguez, “Lutxo” Echevarria, Alejandro Lasa, Carlos Lora (kapitaina), Ekain Hiribarren, Imanol Rodriguez, Koldo Segurola eta Keoma Pacheco.
Marco Dufrechouk debuta egin zuen teknikari lanetan eta Iñigo Camarero eta Leire Muñoz Caorekin batera aritu zen gidaritzan aulkitik eta Tom Walsehn aholkularitzarekin. Epailea, berriz, Miguel Angel Zulaika izan zen.
Zaisa Txingudiz gain, 14, 16 eta 18 urtez azpikoek ere izan zituzten partidak, baina ez dituzte denek nahi zituzten emaitzak lortu.
14 urtez azpikoei dagokienean, Gipuzkoako txapelketaren denboraldiaurrean ari dira, eta Arrasaten jokatu zuten Deba Arroa eta Gaztediren aurka. Partida bat irabazi eta bestea galdu zuten gazteek.
16 urtez azpikoek, haatik, 10-36 irabazi zuten Getxon bizkaitarren bigarren taldearen aurka; eta, 18 urtez azpikoek, azkenik, 67 eta 7 galdu zuten Getxo B-ren aurka.
Hori gutxi balitz, asteburuan Gipuzkoako errugbi eskolen denboraldi berriari eman zioten hasiera Hondarribiko hondartzan, eta bertan 10 eta 12 urtez azpiko 400 jokalari inguru elkartu ziren hamar zelaietan banatuta.
Xabi Sanchez, Txingudiren errugbi eskolako arduraduna: “Urteak daramatzagu topaketa hau antolatzen denboraldi hasieran eta, urtez urte, handiagoa bilakatzen ari da. Pozik gaude hainbeste jende errugbiaren inguruan ikusteko aukera izateagatik”.
Sanchezek topaketa horretan lanean aritu ziren guztiei eskerrak emateaz gain, gogorarazi nahi izan du entrenamenduak ostiraletan egiten dituztela, Plaiaundin, 18:30ean, eta “guztiz irekiak direla errugbia probatu nahi duten neska mutilentzat”.
