Kote Gebara: "Inoiz egin dugun bizikleta martxarik handiena izan da"
Mugikortasunaren Astea antolatzea "positiboa" den arren, mugikortasunaren inguruko elkarrizketa aste horretara mugatzea soilik "arriskutsua" izan daitekeela uste du Balaztako kideak.
Irailaren 16tik 22ra, herriko hainbat eragilerekin elkarlanean, Hondarribiko Udalak Mugikortasunaren Astea antolatu zuen. Jarduera gehienak aste horretan bertan burutu baziren ere, bizikleta martxa eta Mendelu kaleko festa astebete atzeratu behar izan zituzten, eguraldiaren ondorioz.
Aldaketa horrek, ordea, ez zituen jarduera horien helburuak zapuztu. Bizikleta martxa oso jendetsua izan zela azaldu du Kote Gebara Balazta elkarteko kideak. 300 bat herritar baino gehiago hurbildu ziren goizeko 11:00etan Damarri plazara, eta elkarrekin Mendeluraino egin zuten bidea.
“Uste dut inoiz egin dugun martxarik handiena izan zela. Egun polita izan genuen bizikletan ibiltzeko. Familia ugarik parte hartu zuten eta haur piloa etorri zen”. Azken horrekin bereziki oso pozik agertu da Gebara, Balaztaren helburu nagusietako bat jende gazte eta haurrengan bizikletaren erabilera sustatzea delako.
Gainera, hainbeste jende bildu izana “oso inportantea” dela iritzi du, “ez soilik erakusteko jende multzo handia garela bizikletaz ibiltzen garenok, baita gure artean zenbat garen ikusteko ere”.
Azaldu duenez, oso kontaketa gutxi egiten dira bizikleten erabiltzaileak zenbat diren zenbatzeko. Martxa horren bidez jende asko direla ikusi ahal izan dute. “Ez dut esaten egunero erabiltzen dutenik, baina bai maiz erabiltzen dutela. Gainera, jendea prest dago kalera ateratzeko eta hori oso garrantzitsua da guretzat, bizikletaren erabilerari duintasuna ematen diolako”.
Horrek bereziki, bide horretatik jarraitzeko gogoa ematen diola kontatu du Gebarak, eta “baita erabiltzaileei ere, ikusten dutelako ez daudela bakarrik”.
Bizikleta martxa Mendelu auzoan bukatu eta Mendelu jaiarekin bat egin zuten orduan. Iaz Balaztak antolatu zuen arren, aurten udalak bere gain hartu du jaiaren antolaketa. Gebararen esanetan “oso giro polita” sortu zen bertan. Puzgarriak, haurrentzako jokoak eta paella dastatu ahal izan zituzten.
Bestelako jarduerak
Aste horren barruan mahai inguru bat, Nagusikleta egitasmoaren baitako ibilaldiak eta bizikletak konpontzeko zerbitzua eskaini ziren ere. Balaztak mahai inguruan parte hartu zuen eta “oso interesgarria” izan zela azaldu du. “Interesgarria izan zen, adibidez, ikusteko elbarriek zein arazo dituzten, eta aurrerantzean horiek kontuan izateko”.
Bestetik, Nagusikleta egitasmo arrakastatsua ere aste honen baitan kokatu nahi izan zuten. Erresidentziekin lotura zuzena duen egitasmoa da eta ia astero egiten dute.
Azkenik, larunbatean, bizikletak konpontzeko zerbitzua eskaini zuten. Gerturatu ziren herritarren bizikletei balaztak, abiadura aldagailuak edota gurpilak begiratu zizkieten, eta horiek konpontzeko, aldatzeko edota puzteko aukera izan zuten.
Balazta elkarteak Irunen duen tailerrean (Euskal herria kalean) ematen duen zerbitzua da honakoa, asteazken arratsalde eta larunbat goizetan. Batez ere beren bazkide diren pertsonei zuzenduriko zerbitzua da, baina bazkide ez direnei ere “halako mantenu lan errazak” egiteko arazorik ez dutela gaineratu du.
Zenbaitetan mantentze lan horiek norberak egiten ikasteko ikastaroak antolatzen dituzte ere, hasi berriak direnentzat zein aurreratuentzat.
Balaztaren izaera aldarrikatzailea
Hondarribian Mugikortasunaren Astea antolatzea “positiboa” den arren, mugikortasunaren inguruko elkarrizketa aste horretara mugatzea soilik “arriskutsua” izan daitekeela uste du Balaztako kideak. Eta aldi berean, ez dute ospakizunetarako aste bat bilakatzea nahi.
“Mugikortasunaren Astea urtero egiten da, eta horrekin, bizikleta martxa egin eta mugikortasunaz hitz egiten dugu. Baina urtean zehar ez da gaia ia apenas aipatzen”. “Eta aldi berean, ez dugu ospakizunerako aste bat bihurtzea nahi. Giroa ez dago gaizki baina aldarrikapenak mantendu behar dira” esan du Gebarak. Ez Balaztak ezta udalak ere ez dutela joera horretan erori nahi ziurtatu du ondoren.
Balazta elkartearen izaera aldarrikatzailea dela gogoratu du kideak, eta horregatik, bereziki, Mendeluren presentziaren garrantzia nabarmendu du; Balazta sortu zenetik Mendelu eta Amute arteko bidegorria egitea delako elkartearen aldarri nagusiena. “Egin gabe dago. Egin izan dira mila proiektu, mila promesa eta mila hitz potolo, baina azkenean bidegorririk gabe jarraitzen dugu”.
