Sozialistek uholdeak saihesteko "behin betiko plana" eskatu dute
Hondarribiko Udalak 2024an ikerketa hidraulikoa kontratatu eta urte bereko urrian proiektu proposamena URA agentziari bideratu zion. Gaur gaurkoz erantzunik jaso gabe jarraitzen du.
Iaz udalak uholdeak saihesteko neurriak hartu zituen. Hilaren 6an, 7an eta 8an eta azaroaren 4an, 5ean eta 6an uholdeak gertatzeko probabilitate handia dagoela ohartarazi du Hondarribiko PSE-EE alderdiak. Esan dutenez, egun horietan mareen koefizientea altua izango da.
Zentzu horretan, egun horietan gerta daitezken uholdeei begira, Hondarribiko Udalari “beharrezko neurriak hartzea” eskatu diote sozialistek. Eta aldi berean, uholdeek udalerriko zenbait urbanizazio eta laborantza guneetan eragiten dituzten kalteak konpontzeko, uholdeei aurre egiteko behin betiko plan bat abian jartzea eskatu dute. “Bereziki, Mendelun, Lau Aizetako bidean eta Santa Engrazia errekan gertatzen diren ur ateraldiei erantzun bat emateko”.
Sozialistek, gainera, otsailean ezin bezala gai honi buruzko “informazio falta eta utzikeria” leporatu diote udal gobernuari eta “arazoak aurreikusteko” eskatu diote.
Ikerketa hidraulikoa
Duela urtebete Estitxu Urtizberea zinegotziak jakinarazi zuenez uholdegarritasuna jasaten duten eremu gehienenetako eskudunak Kostaren eta Itsasoaren Espainiako Zuzendaritza Nagusia eta URA agentzia dira, eta beraz, udalak zailtasunak izaten ditu interbentzioak egiteko.
Aldi berean, udalak 2024ko otsailean gertatutako uholdeen ondoren ikerketa hidraulikoa kontratatu zuela azaldu zuen eta behin proiektua jasotakoan URA agentziari bideratu ziotela. Agentziako arduradunek proiektuari “argi berdea” emango baliote, lanak lehenbailehen hasiko liratekeela azaldu zuen. Hitzak egiaztatu duenez, udalak erantzunik jaso gabe jarraitzen du.
