Asfaltatze kanpaina Hendaia eta Astigarra kaleetan hasiko da
Irungo beste hiru guneetan ere lanak egitea aurreikusi dutela jakinarazi dute. Hendaia eta Astigarrako lanen aurrekontua 288.765,03 eurokoa da.
Irungo Udaleko Obra, Mantentze lan eta Azpiegitura arloa asfaltatzen kanpaina berri batekin hasi da, eta Gorka Alvarez ordezkariak egikaritzen ari diren jardueren nondik norakoak eman ditu gaur goizean. Zehazki, Hendaia eta Astigarra kaleetan ari dira lanak egiten, baina beste hiru puntutan lanak egitea aurreikusi dute. Egun lanak egiteaz arduratzen ari den enpresa Excavaciones y Transportes ORSA, S.L. da, eta hiru hilabeteko epea dute amaitzeko. Lan horiek gauzatzeko 288.765,03 euroko aurrekontua dute, BEZ barne.
Alvarez: “Bide publikoa hobetzeko lan horiek herritar guztien onurarako dira, eta, horregatik, urtero hiriko hainbat puntutan jarduten dugu asfaltatzen kanpaina honen bidez. Beharrezko hobekuntzak dira, udal eskumeneko bide azpiegituretan gertatzen diren narriadurak garrantzitsuak izaten direlako, eta aurrekontuen arabera egiten dira”.
Era berean, azaldu dute Irungo zenbait kaletako zoruak birgaitzeko kontserbazio egoera txarrean dauden bideen inguruko azterketa bat egin dutela zoladuraren narriadura zenbatekoa den eta azpiegituren egoera nola dagoen ebaluatzeko.
