Herriko klubek antolatzen duten emakumeen kirol eskaintza zerrendatu dute
Parean elkarteak egin du gida, eta kirolean emakumeak sustatzea da helburua. 'Hamaika emakume, hamaika erronka' erakusketa ere inauguratu dute.
Gaur goizean Parean elkarteak herriko klubek antolatzen duten emakumeen kirol eskaintza eta emakumeen kirola ikusaraztea helburu duen Mendi Urruzunoren Hamaika emakume*, hamaika erronka argazki erakusketa aurkeztu ditu.
Parean elkarteak hiru urte daramatza kirolaren alorrean lanean, eta gaurkoan herriko klubek emakume eta neskatoei zuzentzen dizkien eskaintza gida izan dute hizpide. Hirugarrenez egin dute gida, eta eskualdeko kirol eskaintza bildu eta zabaltzen dute ikastetxeetan eta guraso elkarteetan bezalako lekuetan.
Orotara, 30 elkartek baino gehiagok hartu dute parte osaketan, eta ondu duten zerrenda horretan kirol bakoitzaren xehetasun guztiak jarri dituzte. Hala ere, aurten, berrikuntza modura, klub bakoitzarekin lanean aritu direnean ikusi dituzten praktika onak edota aholkuak zerrendatu dituzte “indarkeria matxista ekidin eta benetako berdintasuna sustatzeko kirolean”.
Era berean, erantzunkidetasuna sustatzeko edota kontziliazioa sustatu eta emakumeen parte hartzea handitzeko egon daitezkeen aholkuak ere zerrendatu dituzte. Horren adibide modura aipatu dituzte ordutegi malguak edota komunikazio eta planifikazio argia.
Behin gidaren nondik norakoak azalduta, Mendi Urruzunoren erakusketari heldu diote. Parean elkarteak jarri du erakusketa, baina Txingudiko Elkarte Feministarekin eta Irungo Emakumeen Etxearekin elkarlanean ekarri dute Irunera. Urruzunok azaldu duenez, erretratuaz aparte horri buruz zer kontatu nahi zuen adierazteko dauzkate argazki laguntzaileak, eta hori, azaldu duenez, “sormena edo istorioa kontatzeko egindako ahalegin bat” da.
Argazkilariaren ondotik, Txingudi Elkarte Feministak hartu du hitza, eta azaldu du Behobian emakumeek parte hartzeko proiektu bat dutela. Gainera, Parean elkartearekin batera hitzaldi bat emango dutela ere aurreratu du.
Kera elkartea ere izan da aurkezpenean, eta kontatu dute topaketa pedagogiko eta feministak egiten dituztela emakume ijituekin, eta kirola “nahiko presente” egoten dela topaketa horietan. Ildo horretatik, aurreratu dute datorren astean egingo dituztela bosgarren topaketak, eta “bereziak” izango direla ere gaineratu dute.
HITZA Mendi Urruzunorekin izan da, eta erakusketaren nondik norakoak azaldu ditu.
