Cristina Laborda mugikortasun elektrikoari buruzko mahai inguru batean izan da
Malagan (Espainian) dago alkatea, zehazki, 'GreenCities, Urban Intelligence & Smart Mobility 2025' foroan. Bihar ere hartuko du parte.
Cristina Laborda Irungo alkatea GreenCities, Urban Intelligence & Smart Mobility 2025 foroko lehen jardunaldian izan da, Malagan (Espainia). Ehun hiri, 200 entitate eta 150 aditu baino gehiago biltzen ditu foro horrek, eta hirien jasangarritasuna, digitalizazioa eta mugikortasun adimenduna bezalako gaiak izaten dituzte hizpide. Bide horretan, Labordak mugikortasun elektrikoari buruzko mahai inguru bateko hizlaria izan da, eta Irunek arlo horretan egindako aurrerapenak izan ditu hizpide.
Ildo horretatik, hiriak mugikortasun elektrikoaren esparruko mugarri nagusia zein den azpimarratu nahi izan du alkateak, hiri barruko autobus linea guztiak elektrifikatzea, alegia. Zehaztu dutenez, 2019an ekin zioten proiektu horri, eta Irun hiri barruko garraio zerbitzua elektrifikatzeko apustua egin duen lehen euskal udalerria dela aipatu dute.
Are, Labordak gehitu du Irunek 2011n hartu zuela kale guztietan abiadura 30km/hko abiadurara mugatzeko neurria. “Horri esker ezbeharren tasa txikiagoa da, eta garraiobide batzuen eta besteen arteko bizikidetza hobea da”.
Bestalde, Irungo alkateak hiriko mugikortasun politiketan genero ikuspegia “zeharka” kontuan hartzeko erabakia ere izan du mintzagai. “Gure ustez mugikortasun jasangarria ez da ingurumenaren ikuspuntutik bakarrik neurtu behar, ekitatearen, segurtasunaren eta bizi kalitatearen ikuspegitik ere bai”, dio.
Labordak bihar, bigarren jardunaldian, ViaIrun proiektua aurkeztuko du.
