Bertako produktuen kontsumitzaile berriak sortzeko, sukaldaritza tailerra
'Azokatik Mahaira sukaldaritza tailerrak' dinamika martxan jarri dute Gipuzkoako Azoken Sarea lantaldeak eta Hondarribiko Udalak. Urriaren 4an izango da tailerra.
Azokan eta “bertako eta garaiko produktuak” erosiko dituen kontsumitzaile berriak sortu nahian ‘Azokatik Mahaira sukaldaritza tailerrak’ dinamika abiatu dute Gipuzkoako Azoken Sareak eta Hondarribiko Udalak.
“Azken urteetan kontsumitzaileek azokekiko duten harremana aldatzen ari dela” jakitun, hiru helburu ezarri dizkiote dinamikari: “azoketara kontsumitzaile berriak erakartzea, bertako eta garaian garaiko produktuak kontsumitzeak dituen onurak azpimarratzea eta xahuketa ekiditea”.
Bertako eta garaiko produktuen bidez “etxean modu azkarrean eta erosoan errezetak” egiten ikasiko dute parte hartzaileek, “ohiko plateretatik pixka bat urrundu eta egunerokotasunean kontsumitu daitezkeen bertako elikagaiak modu erakargarriago batean prestatuz”. Gainera, “osasuntsuago jatearen” garrantzia azpimarratuko dute hitzorduan. Hortaz, nola jan osasuntsu ere erakutsiko dute.
Anne Otegi sukaldariak eta Aitziber Aizpurua nutrizionistak emango dute tailerra, eta bertan kozinaturikoa dastatzeko aukera izango dute saio bukaeran. Larunbatean, hilaren 4an, 11:00etatik 12:30era bitartean izango da tailerra, Hondarribiko azokan bertan.
