Palestinaren eta bakearen aldeko murala egiteko eskakizuna udalari
Larreaundi-Olaberria Auzo Elkarteak egin du eskaera; iaz ere egin zuten, baina "udalak ekimena blokeatu egin zuen".
Larreaundi-Olaberria Auzo Elkarteak Palestinaren eta Giza Eskubideen aldeko murala egiteko proposamena luzatu dio, berriz, Irungo Udalari. Iaz ere egin zuten eskaera bera, baina nabarmendu dutenez “udalak ekimena blokeatu zuen”.
“Urtebete pasa da, eta Palestinaren egoera are jasangaitzagoa da. Ez Palestinan bakarrik, izan ere, Israel Genozidioa gauzatzen ari da munduaren begietara. Dagoeneko 64.000tik gora izan dira erailak, eta Israelek ofentsibarekin, sarraskiarekin eta okupazioarekin jarraitzeko asmoak adierazi ditu. Hori gutxi ez, eta gosetea eragiten ari da Palestinako populazioaren kontra. Nazio Batuen Erakundea, azkenean, argi mintzatu da: genozidio baten aurrean gaude eta Israel geldiarazi behar dugu”.
Era berean, gehitu dute gizarte eragile ororen erantzukizuna dela sarraski horren aurrean zerbait egitea Palestinan erailtzen ari direnengatik, Giza Eskubideen defentsagatik eta auzo eta “gure” auzo eta hiriaren balioengatik. “Errespetuzko jarrerak nahi baditugu, ezin dugu, inolaz ere, genozidio bat normalizatzen utzi. Haiengatik eta gugatik berresten dugu denok dugula sarraski horren aurrean ekiteko betebehar etikoa”.
Horregatik guztiagatik, iaz egindako proposamen bera luzatu diote Irungo Udalari; finean, Palestinaren eta bakearen aldeko murala egin nahi dute, komunitatean, Giza Eskubideen aldeko balioak indartuz.
Eta honela amaitu dute deia auzo elkartekoek: “Zinez espero dugu, oraingoan, Irungo Udalak elkartasuna adierazteko beharrarekin bat egingo duela, eta defendatu beharreko giza balioen defentsan Palestinaren aldeko murala egiteko oztoporik ez duela jarriko. Hori horrela denean, irundar denak gonbidatuko ditugu, elkartasunez eta margoz, elkartasuna adieraztera”.
