Gipuzkoako erresidentziak greban dira berriro
Elkarretaratzeak egiten ari dira Irun eta Errenteria-Oreretako zaharren egoitzetan.
Erresidentzietako ELAko langileen aurreko protesta bat. Gipuzkoako erresidentzia eta eguneko zentroetako langileek hiru greba egun egingo dituzte gaurtik hasi eta ostiralera arte. Horiekin bederatzi izango dira dagoeneko sektorearen hitzarmenaren negoziazioan dagoen blokeoa salatzeko egingo dituzten greba egunak.
Gipuzkoako Foru Aldundiari eta erresidentziak zein eguneko zentroak kudeatzen dituzten enpresei interpelazioa egiteko elkarretaratzera deitu dute bihar langileek, ELA sindikatuak jakinarazi duenez. Irun eta Errenteria-Oreretako zahar egoitzetan egingo dituzte protestak, sektoreko langileek pairatzen duten soldata arrakala eta partzialtasuna salatzeko eta hitzarmenaren negoziazioaren bidez konponbidea jartzeko exijitzeko.
Irungo Gurutze Gorriaren egoitzan hasiko dute elkarretaratzea bira 10:45an, eta Ama Xantalen egoitzara joko dute 11:30ean. Arratsaldez berriz, Errenteria-Oreretan ariko dira protestan, Sanmarkosenen 17:00etan eta Jesusen Bihotzaren egoitzan 18:00etan.
