'Liquid Gogo' poposamen indibiduala hartuko du Maddalen guneak
"Etengabeko bilakaeran dagoen ingurune biziduna" da Maddalen Arte Garaikiderako Gunea. Datozen hilabeteetan egoitza artistiko bihurtuko da; izan ere, Sandra Cuesta artistak espazioan bertan egingo du lan.
Maddalen Arte Garaikiderako Guneak Liquid Gogo poposamen indibiduala hartuko du datozen asteetan. Sandra Cuesta Aizkorbe artistaren eskutik Maddalen gunea estudio-laborategi bihurtuko da iraila eta urria bitartean.
“Egoitza artistiko honek aukera emango dio bere sormen prozesua antolatzeko, baita esperimentatzeko eta komunitatearekin partekatzeko ere”, azaldu du Igor Arrieta espazioaren kudeatzaileak. Lan berriak sortzeaz gain, Cuestak azken urtean Liquid Gogo seriearen baitan garatu dituen lanak berrikusteko aukera eskainiko du ere.
Maddalen Arte Garaikiderako Gunea inauguratu zenetik bi erakusketa kolektibo jaso ditu eta proposamen berri honi esker aretoa “etengabeko bilakaeran dagoen ingurune biziduna” dela erakutsiko dute. “Ez da ohiko erakusketa espazio bat izango, baizik eta egoitza artistiko irekia izango da. Bertan hainbat ekitaldi publiko gauzatuko dira, zeinen berri laster emango dugun”.
Proiektuaren izaera esperimentalagatik, aretoak ez ditu bere ohiko ordutegiak mantenduko. Arrietak azaldu duenez, artistak espazioan bertan egingo du lan, “bere estudio pertsonala balitz bezala”, eta beraz, ekitaldien datak datozen egunetan iragarriko dituztela adierazi du.
