'Baby' filma ikusteko aukera izango da ostiralean, Amaia KZn
Emanaldiaren ondoren mahai inguru bat egingo dute filmaren zuzendariarekin. 19:00etan izango da saioa, eta ez da sarrerarik behar.
Irungo Udaleko Berdintasunerako eta LGTBIQ+ Eskubideetarako Zerbitzuak antolatuta, ostiralean (hilak 19) Baby filma ikusteko aukera izango da Amaia KZn. Filma Marcelo Caetanok zuzendu du, eta Donostiako Zinemaldiaren azken edizioan Sebastiane Latino saria irabazi zuen.
Emanaldiaren ondotik, Mugen Gainetik garapenerako gobernuz kanpoko erakundeak eta Berdintasunerako eta LGTBIQ+ Eskubideetarako Zerbitzuak mahai inguru bat egingo dute Caetanorekin batera.
Honakoa da filmaren sinopsia: adingabeak atxikitzeko zentro batetik irten berritan, Wellington bakarrik eta noraezean dabil Sao Pauloko kaleetan, ez baitu harremanik gurasoekin, ez bere bizitza berregiteko baliabiderik. Pornoa ematen duten zinema areto batean, Ronaldo ezagutuko du, bizirik irauteko modu berriak irakatsiko dizkion gizon heldu bat, eta, pixkanaka, haien arteko harremana pasio gatazkatsu bat bilakatuko da, esplotazioaren eta babesaren, jeloskeriaren eta konplizitatearen artekoa.
Sarrera doakoa izango da, eta bertaratzeko ez da aldez aurretik izenik eman behar.
