Babes osoa Jaizkibeli
Oso handi egin da Jaizkibel konpainia. Barruan asko, eta kanpoan are gehiago. Babes osoa jaso dute desfilean.
Gernika plazatik Arma plazarako bidea txalo eta babes oihu artean egin du Jaizkibel konpainiak. Agerian gelditu da Gernika plazan gainontzeko konpainia ez parekideek egin dute hutsune saiakerak erantzuna izan duela, eta Alardearen trazatuaren lehen ibilbidea, esanguratsuena, zaleen bultzadarekin egin duela. Oro har, bide horretan aldeko bultzada besterik ez du jaso konpainia parekideak: udaletxe parean, elizaren atarian, Arma plazan… Elizan udal ordezkariak zituen zain Jaizkibelek: HITZAk ikusi ahal izan duenez udal talde politiko guzietako kideak zeuden han, baita Eider Mendoza ahaldun nagusia, Ibone Bengoetxea lehendakariordea, eta Miren Elgarresta Emakundeko ordezkariak ere . Une hori baliatu du Nora Ferreira kapitainak Igor Enparan alkateari gutuna emateko. Sainduan egindako lehen adierazpenetan Ferreirak gutunaren edukiaren laburpena egin du. Esan du Jaizkibel beti egon dela elkarrizketaren alde, baina udalari “estrategia aldaketa” eskatu diote, ezin baititu parekatu eskubideen kontrako alarde matxista eta Jaizkibel.
Arma plazan errebista pasa ondoren, beherakoa ere ongi asko egin du konpainia erraldoiak. Kale Nagusiko galtzada-harriak bustita zeudenez, kontuz egin dute jaitsiera Alarde eguneko oinetakoek, alpargatek, irrist egiteko aukera ematen zutelako. Irrist egin ez dutenak konpainia parekidekoak izan dira, 29.enez atera baitira kalera, Hondarribiko egun handienean, jaiak denenak eta denentzat direla esatera. Konpainia bezala bigarrenez izan dira desfilatzen.
Sainduan adierazpenak egiten ari ira orain politikoak eta eragileetako ordezkariak (09:20). Horien berri geroago emango du HITZAk.
Jarraian, Jaizkibel Arma Plazara sartu den unearen nahiz Gernikako Arbolatik bueltan pasa deneko irudiak eta bideoa.
