Ezustekorik ez: Hondarribia hemeretzigarrenez jarraian Kontxan
Laugarren izan da Hondarribia gaurko gizonen Kontxako estropadan. Lasai ez, baina irmo lortu dute munduko traineru estropada entzutetsuenean izateko eskubidea.
Hondarribiko arraunlariak, gaur, sailkapen estropada ostean lehorreratzen.Hondarribia Arraun Elkartea Orrazkera galdu gabe agian ez, baina esan daiteke Hondarribiak solbentzia osoz lortu duela 2025eko Kontxako Banderarako sailkatzea, laugarren izan dira. Donostiako 130. Banderan izango da hemeretzigarrenez jarraian gizonen Ama Guadalupekoa. Gaurko sailkapen estropada ez da tramitea izan, “bulegoan beste egun bat” askok esaten duten moduan. Baina esan daiteke estuasun handirik ez duela izan Mikel Orbañanosen taldeak hilaren 7 eta 14ko igandeetan hiriburuko estropada mundialean izateko; alde txar bakarra, herriko festetan ezingo dutela oso era aktiboan parte hartu arraunlariek. Sailkapena lortuta eta Kontxan izanda, gaitzerdi. Emakumeen eta gizonen traineru berdeak Kontxan. Oriok eta Donostiarrak bakarrik lortu dute antzerako balentria aurten.
Tentsioa. Hori izaten da Kontxako sailkapen estropadako bezperetan arraunlariek sentitzen dutena. Are gehiago Kontxara iritsi, eta 2 edo 3 metroko olatuak ikusten direnean. Are, itsasora joan eta uhin handi horien zartakoak traineruaren alde guztietatik entzuten direnean.Tentsio hori gorputzetik arraunetara eraman dute gaur kirolari hondarribiarrek, era baikorrean. Tentsioa emaitza bihurtu dute. Ziabogan jada laugarren ziren; Kontxako hondartzaren ondoko bukaerako balizan ere laugarren. Bikain.
Trantsizio urtea du Hondarribiak. Ligan oso egoki aritzea eta Kontxara lasai asko sailkatzea bezalako trantsizioa nahiko lukete askok! Erne: aurreko hitz tartearen jabe den kazetari honek jakin badaki hona horrela iristeko, Hondarribia Arraun Elkarteak ohiko duen diskrezio eta seriotasunarekin lan latza egin duela. Ez da kasualitatea ligan oso egoki aritzea, eta Kontxara sailkatzea. Joseba Amunarriz patroiak ziur ondoan gaurkoa baino tripulazio hobeak izan dituela; baina gaurko sailkapenak eman dion gozamen eta satisfazioa gutxitan nabarituko zuen platanito berdearen barruan. Are, arraunlari gehien-gehienak herrikoak direnean. Hondarribiko harrobiaren garaipena gaurkoa ere bai.
Kontxa eskuan, orain, lehiatzen gozatzea t0katzen zaie Ama Guadalupekoa trainerukoei. Gerra emango dute, zalantzarik ez da.
Jarraian, gaurko sailkapen estropadaren laburpena postu esanguratsuenen zerrenda eta denborekin.
1. Bermeo 21.01
2. Orio 21.11
3. Zierbena 21.14
4. Hondarribia 21.22
5. Getaria 21.23
6. San Juan. 21.29
7. Lekeitio. 21.29
8. Ondarroa 21.42
18. San Pedro 22.51
21. Hibaika 24.49
