Gros XT-ko Alejandro Francok irabazi zuen XIII. Xake Txapelketa Aktiboa
Iragan igandean izan zuen Marlaxka xake elkarteak Hondarribiko Gazteluko XIII. Xake Txapelketa Aktiboa. 51 jokalarik parte hartu zuten.
Joan den igandean, abuztuaren 31n, izan zen Marlaxka xake elkarteak Silvestre Moreiro Sanchez omentzeko antolatzen duen Hondarribiko Gazteluko XIII. Xake Txapelketa. Haatik, jokatzeari ekin aurretik Moreiro Sanchez elkarteko kide garrantzitsu izandakoa eta Karlos Santiago Etxeberria helduen astelehenetako eskolako ikasle eta taldekide izandakoaren omenez minutuko isilunea egin zuten lehiakideek. Uztailaren 27an zendu zen Moreiro; Santiago, ordea, abuztuaren 21ean hil zen, mendi istripu batean.
Hainbat xake elkartetatik 51 jokalari gerturatu ziren guztira. Suitzar sisteman lehiatu zuten, hau da, hamabost minutuko eta jokaldi bakoitzeko hiru segundo gehigarriko partidak egin zituzten.
Gros XT xake elkarteko Alejandro Franco Alonso izan zen garailea. Bigarren postuan gelditu zen Marlaxkako Patxi Moreno Estebanez, eta hirugarrenean Gros XT-ko Alex Odriozola Coscolin.
Saria banatu ondoren, Moreiro Sanchez oroitzeko ekitaldi “hunkigarria” egin zuten. Omenduaren familiarekin batera, lagun eta xake elkarteko kide izandako Leontxo Gracia Olasagasti kazetaria eta Juan Ignaxio Pibe Alonso Arburu jokalaria gertua ziren, “emozioz beteriko momentuak biziaraziz”.
Eguna borobiltzeko, askaria egin zuten Klink elkarte gastronomikoan.
