Oinarriak sendotzea, Txingudi Rugby Klubaren helburuetako bat
Klubak ikasturteko berriko entrenamenduen, berrikuntzen eta aurreikuspenen inguruko informazioa helarazi du.
Udako oporrak berriki amaitu badira ere, Txingudi Rugby Kluba ez da geratu, 2025-26 denboraldia prestatzeko lanetan aritu baita. Gainera, jakinarazi dute denboraldi horretarako zenbait proiektu jarri nahi dituztela martxan “emakumezkoen errugbiaren sustapenari, harrobiko taldeei eta teknikarien prestakuntzari garrantzi handia emanez”.
Aipatutako arlo horietako arduraduna Xabier Castaño izango da; Baionako Aviron, Tarbes eta Zarautzen jokalari izandakoa da, eta, Espainiako selekzioarekin ere jokatu zuen. Denboraldi berri honetan Zarauzko harrobiko lanak Irungo erronkekin uztartuko ditu.
Bestalde, gizonezkoen taldearen talde teknikoko berrikuntza bat ere jakinarazi dute: Tom Walsh. Heziketa eta prestaketa fisikoan aditua da, eta Fiji, Australia, Irlanda, Frantzia, Hong Kong eta Alemania bezalako lekuetan egin du bere kirol ibilbidea. Walsh Iñigo Camarero eta Leire Muñozekin batera ariko da lanean.
18 urtez azpikoen taldearen ardura, berriz, Iñigo Aizpurua eta Keoma Pachecorena izango da, Carlos de la Fuente, Peio Castellano eta Hodei Guerreroren laguntzarekin. 16 urtez azpikoen taldearekin lanean Gorka Eizagirre, Alba Saiz eta Julen Iglesias ariko dira, eta, 14 urtez azpikoekin, berriz, Koldo Alonso, Urtzi Berastegi, Peiko Pardo eta Hodei Aizpurua. Eskolako monitoreak Unai Arbelaiz, Xabi Sanchez, Onintza Burgera, Koldo Segurola, Adrian Muñoz, Oier Oliveira eta Ander Arrieta izango dira.
Plakajerik gabeko modalitateak eta prestaketa fisikoko taldeak aurreko urtetako teknikariak izango ditu: Aitor Petrikorena, Iñaki Urrutxurtu, Jose Mari Zabala, Arantxa Ausan eta Pako Franco.
Emakumezkoen talde berria sortzea izango da klubaren erronketako bat, eta horretarako bosteko errugbia sustatuko dute. Garazi Santosek gidatuko ditu 14 eta 17 urte arteko nesken entrenamenduak astelehenero.
Klubak jakinarazi du denboraldi osoko entrenamenduak irekiak direla; gizonen entrenamenduak astelehen, astearte eta ostegunetan izango dira, 19:30etik 21:00etara. Emakumeen saioak ere egun berdinetan izango dira, 19:00etan hasita. 16 eta 18 urtez azpikoek astearte eta ostegunetan izango dituzte entrenamenduak 18:00etatik 19:30era, eta, 14 urtez azpikoen saioak, Eskola eta bosteko errugbiko taldeak Hondarribiko jaien ondoren hasiko dira.
Informazio gehiagorako klubak 688 74 53 62 zenbakia eta helbide elektroniko bat helarazi ditu.
