Hondarribiko hotelen okupazioa, gora eta behera uztailean
Hondarribiko hotelen okupazioa %85ekoa izan da, "iazko datuen azpitik", Bidasoa Bizirk-en arabera. Dena den, uztailaren 25etik aurrera "igoera nabarmena" izan dela ondorioztatu dute.
Palacete hotela Hondarribiko Alde Zaharreko Gipuzkoa plazan. Bidasoa Bizirik-ek emandako datuen arabera, iragan uztailean %85ekoa izan da Hondarribiko hotelen okupazioa. Agentziako iturrien arabera, uztaila “berezia izan da beste urte batzuekin alderatuta”, jaitsiera nabaritu baitute herriko hotelek. Uztaila, beraz, “iazko datuen azpitik” egon dela ondorioztatu dute. Bereziki lehen hamabostaldian sumatu dute jaitsiera hori, baina uztailaren 25etik aurrera “igoera nabarmena” izan dela diote.
Herrira etorri direnen erdia baino gehiago Espainiako Estatutik etorri dira; %63,29a izan da, eta kanpotik, berriz, %36,71a heldu da.
Turismo bulegoi erreparatuz gero, orotara 4.033 lagun pasa dira, iazko kopurua baino “askoz txikiagoa”, Bidasoa Bizirik-en arabera.
Agentziaren arabera, azken urteotan “Hondarribia Helmuga Turistiko Adimendun bihurtzeko” lanean aritu dela diote, “turismo jasangarri eta irisgarri baten aldeko apustua eginez”. Hala mintzatu da Bidasoa Bizirik-eko presidenteorde Estitxu Urtizberea: “Oinarrizkoa da Hondarribian bizi diren pertsonen eta bisitatzen gaituztenen arteko oreka aurkitzea. Gure konpromisoa da turismo jasangarri baten alde lanean jarratizea, gure hiriaren kultura eta ondarea errespetatuko dituena. Ziurtatu nahi dugu hazkunde turistikoak ez duela modu negatiboan eragiten gure bizilagunen bizi kalitatean eta, aldi berean, bisitariei esperientzia autentiko eta aberasgarria eskaintzea”.
