Aurten 4.800 laguni eman die ostatu Irungo aterpetxeak
4.880 erromes pasatu dira otsailetik gaur arte Lesaka kalean aurki daitekeen aterpetxetik, Done Jakue bideko iparraldeko bideari ekiteko.
Done Jakue bidean Irundik igarotzen diren erromesak gero eta gehiago dira, urterik urtera goraka egin dute Irungo erromesen aterpetxeko datuek. Cristina Laborda Lesaka kalean aurki daitekeen ostatuan izan berri da, aterpetxea kudeatzen duen Jacobi Irun-Bidasoko Done Jakue Elkarteko presidente Josin Galzakortarekin.
Bertan aipatu dutenez, milaka dira urtero Irundik abiatzen diren erromesak Iparraldeko Bidetik jotzeko, eta bide horretan Irungo aterpetxea “ezinbestekoa” dela dio, “harrera eta atseden hartzeko lekua eskaintzen baitizkie erromesei”. Aterpetxea topagune ere badela erantsi du alkateak, “eta esperientziak partekatzeko eta Done Jakue bideak hain berezko duen komunitate espiritua indartzeko”.
Datuei erreparatuta, aurten 4.880 laguni eman die ostatu Irungo aterpetxeak, otsailetik uztailera hain zuzen. 2.822 gizonezko izan dira, eta 2.058, berriz, emakumezko. Bisita gehienak uztailean izan dira, 2.257 izan dira iragan hilean.
Topaketa Ficoban
Done Jakue Bidearen Lagunen Elkarteak urteroko topaketa iragarri du, Irunen egingo dena. Datorren urriaren 10etik 12ra egingo dute, Ficoban. Asteburu horretan askotariko jarduerak eskainiko dituzte, eta bukatzeko, erromesaren pordoia entregatuko dio elkarte antolatzaileak beste bati, hurrengo urteko topaketaraino gorde dezan. Ekitaldi horrek, udaleko iturrien arabera, “erromesaren oinarrizko balioak islatzen ditu, eta ibiltzeko unean hezurmamitzen da”. Topaketa honetan 150 lagun inguru bilduko direla aurreikusi dute antolatzaileek.
