Grand Slameko hirugarren partida, bihar

Arratsaldeko 20:00etatik aurrera Jostaldi pilotalekuan izango da hitzordua. Oier Kanpandegi hondarribiarra pistara itzuliko da.

Bihar arratsaldean Hondarribiko Grand Slameko hirugarren partida jokatuko da arratsaldeko 20:00etatik aurrera Jostaldi pilotalekuan. Hondarribiko pilota eskolako gazteen arteko partidarekin hasiko da ekitaldia: Arrasate-Itoitz Altuna-Garat-en kontra arituko dira, eta ondoren, grand slameko hirugarren partidari emango diote hasiera.

Oier Kanpandegi hondarribiarra Erik Mendizabal bolibiarrarekin batera itzuliko da pistara. Victor eta Oyhenard-ek osatutako bikotea izango dute aurkari, eta Jai Aliveko kideek aurreratu dutenez partida “oso irekia” izatea espero da. Victorren eta Oyhenard-en estreinako partida izango da aurtengo grand slamean.

Emakumeek oraindik bi aste gehiago itxaron beharko dute lehen partiduaren hitzordurako. Abuztuaren 22an hasiko da beren txapelketa: Emakumeen Master Series-a.

Hilaren 1eko emaitzak

Joan den ostiralean Hormaetxea-Bailo bikotea Bixente-Atain-en kontra lehiatu zen. Bi set-ak Hormaetxea eta Bailoren alde erori ziren arren, partida oso estua izan zen hasieratik. Are, Bixente-Atain bikotea bigarren set-a irabazteko zorian izan zen (15-07; 15-13).

Sarrerak 10 euroan eskuratu daitezke Eventbrite webgunean, Arma Plazan, Turismo bulegoan edota pilotalekuan bertan.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.