Bidasoa Folk jaialdiak dantzan jarriko du eskualdea
Hilaren 22tik 24ra izango da aurtengo edizioa eta Irun, Hondarribia eta Hendaia zeharkatuko ditu.
Bidasoa-Txingudi Mugaz Gaindiko Partzuergoak Bidasoa Folk musika jaialdia hilaren 22, 23 eta 24an izango dela jakinarazi du. Irun, Hondarribia eta Hendaian izango dira kontzertuak, egun eta udalerri bakoitzean bina. Aurtengo edizioa “aberatsa eta anitza” dela azpimarratu dute partzuergoko ordezkariek, “San Jorocho mexikarraren erritmoetatik hasi eta Gwennynen pop-rock zeltaraino”. “Hunkituko gaituzten kontzertuak entzungo ditugu, musika herrikoiak orainean errotzen eta berrasmatzen laguntzek dutenak”, Estitxu Urtizberea Partzuergoko Zuzendaritza Batzordeko kidearen hitzetan.
Doakoa izango da sarrera, edukiera bete arte. Hiru herrietan kanpoan antolatu dituzte kontzertuak; hala ere, euririk egingo balu, estalitako areto batera lekualdatuko lituzketela adierazi dute.
Arte eta musikaren bidez “ondare immaterialarekin, inklusioarekin, kultura arteko elkarrizketarekin eta eskualdearen sustapenarekin” duten konpromisoa baieztatu nahi izan dute aurtengo egitarauarekin. Kontzertuez harago doa jaialdia, “esperientzia kolektiboa da”.
Nuria Alzaga Partzuergoko Zuzendaritza Batzordeko lehendakariaren arabera, jaialdia “erreferentzia sendoa da udako kultur programazioan”. Gainera, “Bidasoa Folk funtsezko jarduera da hiru hirien arteko lankidetza eta Irunen, Hondarribian eta Hendaian bizi garenon arteko elkarrekintza erakusteko”. Hala, “herritar guztiak gonbidatu” ditu Itziar Aizpuru batzordeko kideak, “jarrera irekiarekin eta jai giroan”.
Bidasoa Folk jaialdiko egitaraua
Hendaia, hilak 22. Gaztelu Zahar
- 20:00. Son de Madera (Mexiko)
- 21:30. Gwennyn (Bretainia)
Hondarribia, hilak 23. Arma plaza
- 20:30. Chloe Bird (Espainia)
- 21:30. El Gato con Jotas (Espainia)
Irun, hilak 24. Junkal plazatxoa
- 20:00. Belharra (Euskal Herria)
- Joaquin Pradilla Sexteto (Espainia)
