'Elkarrekin' proiektuaren lehen atala, ikusgai
Atzo arratsaldean partekatu zuen Guztion Alardeak zortzi atal dituen proiektuaren lehen atala. Amane, Irati eta Olatz dira atal honetako protagonistak.
Guztion Alardeak uztailaren 30ean aurkeztu zuen Jaiak elkarrekin proiektua. Haren baitan prestatu dituzten zenbait egitasmoren berri eman zuten Kultur Etxean. Horietako bat da Elkarrekin. 8 ataleko proiektua da eta atzo arratsaldean partekatu zuten lehena.
Amane, Irati eta Olatz dira atal honetako protagonistak. Hondarribiko Alardearekiko zenbait hausnarketa egin eta parte hartu nahiko luketeen konpainiako jantziak jantzi zituzten. Bideoan haien erreakzioak jaso dituzte.
Ostiral arratsaldean (hilak 8) abiatuko dute Jaiak elkarrekin proiektuko bigarren egitasmoa. Kasino Zaharrean mural herrikoia egingo dute, arratsaldeko 16:30etik aurrera. Julia Lasaren, Naiara Goikoetxearen eta Maore Sagarzazuren gidaritzapean, murala elkarlanean margotzeko deia egin dute antolatzaileek.
