Pailazoek irekiko dute Girabira igandean
Girabiraren hamaikagarren edizioa izango da aurtengoa. Pailazogintza tailerra eta pailazo ikuskizuna izango dituzte igandean.
Musika, parkeak eta ekin leloarekin ekin dio aurten Girabira programak hiriko parkeetan zehar emanaldiak, tailerrak eta piknikak antolatzeari. Lau izar izango ditu aurtengo edizioak: pailazoak, txotxongiloak, dantza eta musika. Hamaikagarrena izango da aurtengoa, eta Soroxarta parkean aurkeztu dute gaur.
Igandean (hilak 10) hasiko da egitaraua, 17:30etik aurrera egingo diren pailazogintzari buruzko bi tailerrekin. Artean Espazioa deitzen da lehen tailerra, eta lau urtetik gorakoek sorkuntzaren bidez emozioak azaltzen ikasiko dute, familien laguntzarekin. Bigarren tailerra A&B Shows-ek emango du, eta pailazo keinuak ikasiko dituzte parte hartzaileek. Hogei minutuko paseak egingo dituzte, eta “adierazpena eta sormena landuko dute modu dibertigarri eta ludikoan”.
Egun berean, 19:00etan, antzerkia ere egingo dute. Ganso & cia konpainiak Hamlet lanaren parodia bat antzeztuko du, keinu bidezko pailazo komedia izango delarik. Gainera, piknik toallak eramatera bultzatu dituzte lehen saiora joango diren guztiak, “parkean askaltzeko, tailerrez eta magia ikuskizunaz gozatzen duten bitartean”.
Hurrengo asteetan ere aurrera jarraituko du Girabira programak. Urriaren 12ra arte beste hiru hitzordu finkatu dituzte.
Girabiraren egitaraua
Girabira Txotxongiloa
- Hilak 29.
- Alai Txoko parkean.
- 17:00etatik 20:00etara.
Girabira dantza
- Irailak 27.
- Antzaran parkean.
- 17:30etik 14:30era.
Girabira Txikimusika
- Urriak 12.
- Mendibil parkean.
- 12:30etik 14:30era.
