Irailaren 11n inauguratuko dute CBAko kulturgune berria
Joan den astean datorren ikasturtean CBAri 2.400 metro koadroko kulturgune bat gehituko zitzaiola adierazi eta gero, gaur irailaren 11n irekiko dela jakinaraztearekin batera kultur egitaraua aurkeztu dute.
Hilaren 21ean Irungo Udaleko ordezkariek CBAko kulturgune berria udazkenean irekiko zutela iragarri baldin bazuten ere, inaugurazioak badu data dagoeneko, eta aurreikusitakoaren aurretik izango da, irailaren 11n.
Gune berriak 2.400 metro koadro gehituko dizkio orain arteko eraikinari, eta kultur eta sormenerako erabilera eremu ugari izango ditu: kontzertu, ikus entzunezko ekoizpen edo dantzak ikusteko Irun Zuzenean aretoa, IrekiART hitzaldi eta erakusketa aretoa, gazteen garapen eta aholkularitzarako GazteARTEAN-en bulegoa, edota sorkuntza artistikorako Kontemporanea gunea.
Espazio berriari merezi duen harrera egiteko hiru eguneko inaugurazio egitaraua antolatu du udalak. Irailaren 11n (osteguna) hasiko da, ekitaldi instituzionalarekin. Bertan aurkeztuko dute hortik aurrera gune berriak izango duen egitaraua. Arratsaldean, Jon Bismo artista bisualaren erakusketa irekiko dute. “Artista horren lana eskultura digitalaren eta 3D artearen esparruan mugitzen da. Ideia Berritzailearen Irun Sariaren irabazleak, teknika bisual berritzaileak eta estetika kolorista eta esperimentala uztartzen ditu”. Eguna bukatzeko, Irun Zuzenean aretoa estreinatuko dute Janus Lester-en kontzertuarekin, “aukera paregabea euskarazko musikaren alorrean une honetako izen ospetsu bat hobeto ezagutzeko”.
Biharamunean, irailaren 12an (ostirala), eragile, elkarte eta kolektiboentzako bisita gidatu batekin irekiko dute goiza, “hurbilagotik” ezagutzeko CBAren aretoak eta proposamenak. Arratsalde horretan, Dantza Hirian Irundik igaroko da, eta CBAko gunearen irekiera egitarauan sartu nahi izan du udalak, “CBAk proiektatu nahi dituen balioekin duen loturagatik”. Eguna ixteko, El sentido de la Birra podcasta grabatuko dute 20:00etan, “une honetan gehien entzuten den audio programetako bat”.
Larunbata (irailak 13) Patxi Perez aktore irundarrak zuzendutako familientzako jarduera batekin hasiko dute. Gainera, “CBAren nortasunean oinarritutako izozkia” egingo du egun horretarako Yon Gallardo izozkigileak. Silvia Sanchezek murgiltze erakusketa eramango du gunera, Evolución desde la imperfección: arte, realidad virtual y neurociencia izenekoa. Artoteka ekimena aurkezteko ere baliatuko dute larunbata, arte garaikideko obra bat edonork maileguan hartzeko tresna. Bukatu aurretik, Diego San Jose gidoilariak Conexión con Pío Baroja film laburrari buruzko solasaldian parte hartuko du. Inaugurazio egitaraua ixteko, kontzertu bat eta DJ set bat egongo dira, datozen asteetan iragarriko dituztenak.
