Udarako zenbait jarduera Lapurriturriko informazio gunean
Ekainaren 1etik urriaren 31ra arte asteburu, zubi eta jaiegun guztietan irekia egongo da Lapurriturriko gunea. Tailer eta jarduera ugari antolatu dituzte udarako.
Aiako Herrian kokatutako Lapurriturriko informazio puntuak ekainaren 1ean ireki zituen ateak. Toki berezian aurkitzen da gunea, “naturaz inguratutako mendi ibilbideak egiteko duen kokapen pribilegiatuari esker”. Parke naturalak 6.913 hektareako azalera eta 800 metrotik gorako granitozko hiru gailur (Irumugarrieta, Txurrumurru eta Erroibide) dituela oroitarazi du udalak.
Urriaren 31ra arte asteburu, zubi eta jaiegun guztietan egongo da irekia informazio puntua, 09:30etik 13:30era.
Bisitarientzako baliagarria da informazio gunea, sarri izan ohi dituzten zalantzei erantzuten dieten mapak baitaude, besteak beste, kanpatzeko edo barbakoak egiteko baimenei buruzkoak. Langileen aholkuak ere lagungarriak izango zaizkie.
Borja Olazabal Garapen Iraunkorreko ordezkariak azpimarratu du antolatutako jarduerei esker “familiek inguruko biodibertsitatetik ikasteko aukera” izango dutela. Gainera, “urte amaieran jasotzen ditugun datuetan islatzen da arrakasta”.
Udako lehen tailerra dagoeneko egin baldin badituzte ere, hurrengo hiru hitzorduak partekatu dituzte:
- Abuztuak 16. Fosilei buruzko tailerra: lurraldean aurki daitezkeen fosil desberdinak ezagutuko dira
- Irailak 13. Zuhaitza gure laguna: Lapurriturri inguruan dauden zuhaitz mota guztiak ezagutuko dira, oinez egingo den ibilbide batean.
- Urriak 11. Mikologia ezagutuz: Lapurriturri inguruan aurki daitezkeen onddo mota desberdinak ezagutuko, oinez egingo den ibilbide batean.
