Zazpi polizia laguntzaile berri Irunen
Sei hilabeteko epealdirako kontratatu dira zazpi polizia laguntzaileak hil hasieran. Hiru motozikleta berri eta zaintza kamerak ere erosi dituzte.
Maiatzeko Segurtasuneko eta Bizikidetzako Batzorde Iraunkorrean iragarritako neurriak martxan jartzen hasi dira. Beraz, gaueko aisialdirako guneetan segurtasuna handitzeko planak aurrera jarraitu du, Udaltzaingo eta Ertzaintzaren artean koordinatuta. Jende asko elkartzen den tokietan patruila gehiago egongo dira aurrerantzean, hiriko jaietan egin zen bezala.
Horretarako, hilaren 2an zazpi polizia laguntzaile sartu ziren Udaltzaingora, Eusko Jaurlaritzako Segurtasuna Koordinatzeko Zuzendaritzaren lan poltsaren bidez hautatuak. Sei hilabeterako kontratu dituzte, garai “exijentea” izango delakoan: “udako hilabeteak, mugako pasabideetako irteera eta itzulera operazioekin, Behobia-Donostia bezalako kirol ekitaldi jendetsuak, edo eguberrietako kanpaina”.
Zazpi laguntzaile gehitzeak “Udaltzaingoaren barruan eginkizunak barruan birbanatzea ahalbidetzen du”. Hala, “poliziaren presentzia behar den egoeretan” gaitasun gehiagorekin erantzun ahal izango dute, “zerbitzu eraginkorragoa eta hiri seguruagoa” bermatuz. Nagusiki 14:00etatik 22:00etarako txandan eta asteburuetan jardungo dute.
Gainera, Ama Miraritakoaren kalean bi segurtasun kamera jarri dituzte, baita LED argidun bi zutoin ere, gune horretan argiztapena hobetzeko. Hala, Artiga ibilbidea, Aixin Zolua ibilbidea eta Dunboa, Erlaitz eta Enkantia kaleek LED farola berriak dituzte
Bestetik, Udaltzaingoaren ibilgailuei hiru motozikleta elektriko berri gehituko zaizkie, aurretik dauden lauez gain. Hirian patruilatzeko modu “arin, isil eta ez-kutsatzailea” izango da. “Trafikoa kontrolatzeko, arau hausteen jarraipena egiteko eta pertsonen eta ibilgailuen dentsitate handiko eremuetara azkar iristeko” erabiliko dituzte. “Mugikortasun iraunkorrago baten aldeko konpromisoa” erakusten du erosketa honek, udalaren arabera.
