Udal zerbitzuak artatutako indarkeria matxistaren biktima kopurua %27 igo da 2024an
Gizarte Ongizateko eta Berdintasuneko Aholku Batzordeak 2024ko jarduera memoria aurkeztu zuen aurreko astean. Udaleko ordezkariek eta Irungo 56 elkarte eta erakundek osatzen dute batzordea.
Gizarte Ongizateko eta Berdintasuneko Aholku Batzordeak aurreko astean aurkeztu zuen 2024ko jarduera memoria. Cristina Laborda buru duela, Gorka Alvarez, Josu Iguiñiz eta Maite Cortina udal ordezkariek eta Irungo 56 elkarte edo erakundeetako ordezkariek parte hartzen dute batzordean. Udal aurrekontuaren ia %12a alor honetara bideratzen denez, ordezkari guztien artean aztertu eta gainbegiratzen dituzte jarduerak.
Guztira, 16.819 dei jaso zituen Gizarte Ongizate arloak iaz, eta 12.219 elkarrizketa egin zituen aurrez aurre. 5.514 familiak jaso zuten arloko gizarte langileen arreta. Gainera, otsailetik indartuago dago arloa, bertako ordezkariak astelehenak herritarrekin biltzeko eta gizarte arloko kezkak entzuteko libre gorde baititu.
Berdintasunari dagokionez, udal zerbitzuak artatutako indarkeria matxistaren biktima kopurua %27 igo da, hau da, 153 izatetik 194 izatera igaro dira urtebetean. Horietako seik udalaren gizarte edo hezkuntza mailako laguntza jaso dute. 194 biktimatik 87 emakumek eta sei adingabekok arreta psikologoa jaso behar izan dute, horretara bideratutako foru programaren barruan.
Norabide horretan, Berdintasun eta LGTBIQ+ Eskubideen arloak jarduera ugari antolatu ditu urte osoan zehar. 379 emakume gertatu ziren ahalduntze eskolara, eta beste 600 pertsona emakumeen ibilbide historikora. Gazteek pairatzen duten indarkeria matxista ikusarazteko 12 eta 20 urte arteko ikus-entzunezkoen Irun Beldur Barik lehiaketan 806 neska eta 886 mutilek parte hartu zuten.
Gainera, Emakumeen Etxea elkarteak eta Irungo Udalak Emakumeen Etxea elkarrekin kudeatzeko hitzarmena izenpetu zuten joan den urtean. Informazio, ikastaro eta aholkularitzako 540 eskakizun jaso zituen etxeak. Aholkularitza juridikoa edo sexuala emateko eta tituluak homologatzeko zerbitzuak 138 emakume jaso ditu. Guztira, ia 8.000 pertsonak parte hartu du eskola, komunitate, familia edo jai esparruetako prebentzio kanpainetan.
Ongizaterako hainbat baliabide
Adingabe babesgabeei eskaintzen zaien zerbitzuak 280 familiatako 430 haur jaso zituen 2024an, horietatik 113 iaz ezagututako kasuak izan ziren. 1.100 pertsona baino gehiagok jaso zuten Eusko Jaurlaritzak finantzatutako larrialdirako laguntza.
Gizarteratze arloan ere bikoiztu egin dira artatzeak. 74 arreta egin ziren iaz, horietatik %60 emakumeak direlarik. Larrialdi egoeretan gizarteratzeko ostatua, hotelak, eta gizarte larrialdietarako etxebizitzak erabili dituzte; eta iaz, 43 pertsonari eman zitzaion ostatu, horietatik 16 adingabeak izanik.
1.217 pertsona igaro ziren Zubia gizarteratze zentroko eguneko arreta zerbitzutik; gaueko arreta zerbitzutik, ordea, 960. Beste zenbait eragilerekin elkarlanean antolatu dituzte jarduerak: Larreaundiko auzo elkartearekin, Real Unionekin eta Bidasoa Atletiko Taldearekin.
Baliabide ugari bideratu ditu udalak adinekoengana ere. Zenbait programa abiatu dira, besteak beste, Irun Lagunkoia, “adineko pertsonei bizitza errazteko inguruneak sustatzen dituena”, edo Bizi Gogoz, adinekoei arte, musika eta hazkuntza pertsonalarekin lotutako jarduerak proposatzen dizkiena. Bakardade eta isolamendu egoerak aurreikusteko programa ere abiatu dute, eta Artia, Elitxu eta Katea auzoetako 364 pertsona aukeratu zituzten proiektu pilotuan parte hartzeko.
Giza eskubide, memoria demokratiko eta lankidetzari dagokionez, “dibertsitatearen balioa aitortzeko” ekintza ugari antolatu ziren iaz; tartean, Saharako Errepublika Arabiar Demokratikoaren urteurrenaren ospakizuna, Colon pasealekuko GKEen azoka, edo Irungo hizkuntza eta identitateen topaketa.
Gainera, erbestealdiko biktimak omendu dira, Pikoketako panteoia berri zen fusilatuak omendu ziren, besteak beste.
